पोखरा : गण्डकी प्रदेश सरकारले गठन गरेको ताल विकास प्राधिकरणको कार्यकारी निर्देशकमा अनुप गुरुङ नियुक्त भएका छन् । प्रदेश मन्त्रिपरिषद्को २२ फागुनको बैठकले गुरुङलाई नियुक्त गरेको जानकारी सरकारका प्रवक्तासमेत रहेका भौतिक पूर्वाधार विकास मन्त्री रामशरण बस्नेतले दिए ।
पोखरा १२ का गुरुङले कोरियाबाट कृषि एवं वातावरण विषयमा विद्यावारिधि गरेका छन् । कार्यकारी निर्देशक गुरुङको तलब सुविधा मासिक ४७ हजार रुपैयाँ हुनेछ । आवासबापत १५ हजार रुपैयाँ पाउनेछन् ।
प्रदेश प्रशिक्षण प्रतिष्ठानको कार्यकारी निर्देशकमा कास्कीको मादी १२ का ऋषिराम पाण्डे नियुक्त भएका छन् । उनको मासिक तलब तथा सुविधा ४७ हजार रुपैयाँ हुनेछ । मन्त्रिपरिषदले मुख्यमन्त्री पृथ्वीसुब्बा गुरुङको प्रेस संयोजकमा विक्रम न्यौपाने नियुक्त गरेको छ । लमजुङ राइनासकोटका उनले मासिक तलब ४० हजार ५ सय तलब पाउनेछन् । उनलाई आवासबापत १० हजार, ५ हजार यातायाता र सञ्चार खर्च ३ हजार रुपैयाँ मिल्नेछ । न्यौपाने जनता टिभीमा आवद्ध पत्रकार हुन् ।
मन्त्रिपरिषद बैठकले सरुवा रोग उपचार गर्ने विशिष्टीकृत अस्पताल स्थापनाका लागि संघीय सरकारसँग १ अर्ब ३४ करोड रुपैयाँ माग गर्ने निर्णयसमेत गरेको जानकारी प्रवक्ता बस्नेतले दिए । कोरोना भाइरसको भय फैलिएपछि गण्डकी सरकार सरुवा रोग उपचार अस्पताल खोल्ने निष्कर्षमा पुगेको हो ।
प्रदेश स्वास्थ्य निर्देशानालयले त्यस्तो अस्पतालको खाकासमेत तयार पारिसकेको छ । त्यसका लागि जग्गा भने यकीन भएको छैन । स्वास्थ्य निर्देशक डा. विनोदविन्दु शर्माका अनुसार कोरोना भाइरसको संक्रमणको जोखिम नदेखिएको भए पनि सरुवा रोग उपचार गर्ने अस्पताल पोखराको आवश्यकता हो ।
उनले डेंगु र सार्स लगायत रोग देखा पर्दा त्यस्तो आवश्यकता पहिल्यै महसुस भएको बताएका छन् । उनले ३ सय बेडको अस्पताल पोखरामा खाँचो पर्ने सुनाए ।
प्रदेश सरकारले कोरोना भाइरस नियन्त्रण र त्यसको उपचारका लागि मुख्यमन्त्री पृथ्वीसुब्बा गुरुङको संयोजकत्वमा २६ सदस्यीय उच्चस्तरीय निर्देशन समिति गठन गरेको छ । प्रमुख सचिवको संयोजकत्वमा १७ सदस्यीय समन्वय समिति गठन गरेको जानकारी प्रवक्ता बस्नेतले दिए । धेरै मानिसको जमघट हुने कार्यक्रम नगर्न पनि प्रदेश सरकारले सर्वसाधारणलाई आह्वान गरेको छ ।
प्रतिक्रिया दिनुहोस !
