राजविराज : औषधि लिन बजार गएकी बालिकालाई सामूहिक बलात्कार गर्नेमध्येका चारजना अभियुक्तलाई सप्तरी जिल्ला अदालतले सोमबार १० वर्ष कैद सजायको फैसला गरेको छ ।
जिल्ला न्यायाधीश नन्दकिशोरप्रसाद यादवको इजलाशले सप्तरीको शम्भुनाथ नगरपालिका ३ का २० वर्षीय एटलाण्टिक चौधरी सोही उमेरका अजयकुमार चौधरी, अर्जुनकुमार साह र मनोजकुमार साहलाई जनही १० वर्ष कैद सजायको फैसला गरेको हो ।
कान दुखेको औषधि किन्न पसल गएकी १६ वर्षीया बालिकालाई घर छेउकै गहुँ खेतमा लगी सामूहिक बलात्कार गरेको अभियुक्तमाथि आरोप छ । पीडितका अनुसार ०७४ फागुन २७ गते राति बुवाआमा छिमेकमा भइरहेको विवाहमा गएका बेला कान दुखेको औषधि किन्न बजार गएकी थिइन् ।
आरोपितले बलात्कार गरेको भिडियो समेत मोबाइलबाट खिचेको पीडितले बताइन् ।
फरार रहेका आरोपित शम्भुनाथ नगरपालिका-३ का बबी चौधरी, मिथिलेशकुमार साह र थेपा भनिने ओमप्रकाश पालको मुद्दा भने मुल्तबीमा राखिएको अदालतले जनाएको छ ।
आरोपितविरुद्ध ०७४ फागुन २८ गते जिल्ला प्रहरी कार्यालयमा उजुरी दर्ता भएको थियो । सामूहिक बलात्कारको उजुरी परेलगत्तै ०७४ फागुन २८ गते एटलाण्टिक र अजय पक्राउ परेका थिए । एटलाण्टिक र अजय ०७४ चैत २६ गतेदेखि पुर्पक्षका लागि राजविराज कारागारमा थुनामा छन् ।
जिल्ला अदालतबाट ०७४ चैत २६ गते वारेण्ट जारी भएपछि मनोज र अर्जुन जिल्ला अदालतमा हाजीर भएकोमा जिल्ला न्यायाधीश श्यामसुन्दर अधिकारीको इजलाशमा धरौटीमा रिहा भएका थिए ।
उच्च अदालत जनकपुर राजविराज इजलाशले आरोपित मनोज र अर्जुनलाई पनि पुर्पक्षका लागि राजविराज कारागारमा थुनामा राख्ने आदेश गरेपछि उनीहरु समेत कारागारमा थुनामा छन् । आरोपित बबी, मिथिलेश र ओमप्रकाश हालसम्म पक्राउ परेका छैनन र हाजिर पनि भएका छैनन् ।
प्रतिक्रिया दिनुहोस !
