बेनी : म्याग्दीका असिना पीडित किसानलाई गण्डकी प्रदेश सरकारले एक करोड रुपैयाँभन्दा बढी राहत दिने भएको छ । भूमि व्यवस्था, कृषि तथा सहकारी मन्त्रालयअन्तरगतको आकस्मिक राहत सहयोग सिफारिस समितिले एक करोड एक लाख ९२ हजार ४१९ रुपैयाँ दिने निर्णय गरेको हो ।
असोज २१ गते दसैंको दिन बेनी नगरपालिका २ भकुण्डे, सानालेक, फापरखेत, गौस्वाँरा, रात्माता, मंगला गाउँपालिका १ थाइवाङ र ३ बरंजामा भीषण असिना परेको थियो । ८५४ घरधुरी कृषकको चार करोड एक लाख ४१ हजार ९०५ रुपैयाँ मूल्य बराबरको धान, कोदो र दलहनको क्षति गरेको थियो ।
प्रदेशस्तरीय समितिले पुर्नस्थापनाका लागि कृषकलाई सो रकम प्रदान गर्ने निर्णय गरेको कृषि ज्ञान केन्द्र म्याग्दीका प्रमुख गोविन्दराज रोइरालाले बताए ।जिल्ला विपद् व्यवस्थापन समितिका पदाधीकारी र जनप्रतिनिधिको सहभागितामा असिनाले गरेको क्षतिको स्थलगत अनुगमन गरी विवरण संकलन गरेर सिफारिस गरेको थियो ।
प्रदेशको आकस्मिक सेवा टेवा कार्यक्रम सञ्चालन कार्यविधि २०७५ को दफा ७ र ८ को अधिनमा रही पुनस्थापना सहयोग स्वरुप पुनस्थापना र क्षतिग्रस्त सामग्री खरिदको लागि प्रति रोपनी उत्पादन लागतमा दश प्रतिशतले वृद्धि गर्दा हुन आउने रकम उपलब्ध गराउने निर्णय गरेको हो ।
धान, दलहन र कोदोको क्रमश चालीस लाख तेत्तिस हजार २७५, चौतीस लाख ७७ हजार १९४ र २६ लाख ८१ हजार ९५० रुपैयाँ उपलब्ध गराइने ज्ञान केन्द्रले जनाएको छ ।
दुई हजार ७४६.८७ रोपनीमा लगाएको धान, एक हजार २२६.२ रोपनीमा लगाएको दलहन र एक हजार ६९१.२५ रोपनीमा लगाएको कोदोबाली असिनाले नष्ट गरेको थियो ।
असिना पीडितको सूचिमा रहेका कृषकले पेश गरेका बिल भरपाइका आधारमा सहायता उपलब्ध गराउन बेनी नगरपालिका र मंगला गाउँपालिकासँग समन्वय गरिएको ज्ञान केन्द्रका प्रमुख कोइरालाले बताए ।
बेनी नगरपालिकाको २ नम्बर वडामा ४२० घरधुरी कृषकको दुई करोड १७ लाख, दुई हजार ६००, बरंजाका ३२० घरधुरी कृषकको एक करोड ३३ लाख ५८ हजार १६० र थाइवाङका ११५ घरधुरी कृषकको पचास लाख ८१ हजार ४५ रुपैयाँ मूल्य बराबरको खेतिबाली क्षति पुगेको थियो ।
पाकेर भित्र्याउने बेला भएको धान, कोदो, बोडी, सिमी लगायत खाद्यबाली, तरकारी र फलफुल असिनाले झारेपछि निराश भएका कृषक सरकारले दिने सहायताले राहत मिल्ने बताए।
प्रतिक्रिया दिनुहोस !
