राजविराज : ‘लकडाउन’को दोस्रो दिन बुधबार सप्तरीको अवस्था सामान्य छ । सडकमा अत्यावश्यक बाहेकका सवारी चलेका छैनन् । अत्यावश्यक सेवाका र केही अत्यन्त जरुरी काममा रहेका बाहेक अन्य सबै रोकिएको जिल्ला प्रशासन कार्यालय सप्तरीले जनाएको छ । सार्वजनिक गाडी चलेका छैनन् ।
सप्तरी प्रहरीमा दरबन्दीभन्दा आधा मात्र संख्या कार्यरत रहेकाले ‘लकडाउन’ कार्यान्वयन गर्न नेपाली सेना र सशस्त्र प्रहरीसमेत परिचालन गरिएको छ । प्रहरीले मात्र नियन्त्रण गर्न समस्या देखिएपछि सेना र सशस्त्र परिचालन गरिएको प्रमुख जिल्ला अधिकारी सुनिल खनालले बताए । नेपाल प्रहरी र सशस्त्रको जनशक्ति अभाव भएपछि सेना परिचालन गर्नुपरेको उनको भनाइ थियो ।
बिहान दैनिक उपभोग्य सामाग्री किन्न केही ढिलाइ भएकोमा दिउँसोदेखि कडाइ गरेपछि सडक सुनसान भएका छन् । स्थानीय प्रशासनले प्रमुख बजारमा बुधबार बिहान माइकिङसमेत गराउँदै घर बाहिर ननिस्कन आग्रह गरेको छ । प्रहरीका साथै सेना र सशस्त्र सडकमा ओर्लेपछि लकडाउन पालना भइरहेको छ ।
कोरोना संक्रमण फैलिन नदिन सरकारले देशभरि ‘लकडाउन’ गरेकाले बाहिर नजान र गाडी नचलाउन अनुरोध गर्दै बाटोमा हिँडनेलाई सम्झाइबुझाइ घर फर्काइरहेको छ । जिल्ला प्रहरी कार्यालय सप्तरीका एसपी कृष्ण प्रसाईले सर्वसाधारणबाट ‘लकडाउन’को पालना भइरहेको र नजानेर उल्लंघन गर्नेलाई सम्झाइबुझाइ फर्काएको बताए । अनुमतिप्राप्त गाडी, औषधि उपचार, खाद्यान्न आपूर्ति, सुरक्षा र स्वास्थ्यकर्मीका साधन चलेका छन् ।
प्रतिक्रिया दिनुहोस !
