राजविराज : नेपाल-भारत सीमा बन्द र लकडाउनका समयमा नेपालसँग सीमा जोडिएका भारतीय नाकाहरु सिल गरिएका छन्। अति आवश्यक काम बाहेक मानिसको हिंडडुल बन्द छ। आवागमन ठप्प छ । तर, पनि चोरबाटो प्रयोग गरी लागु औषध सेवनकर्ता लागुऔषध खरिद गर्न भारतीय सीमाका बजार पुगिरहेका छन् ।
प्रहरीले सप्तरीको हनुमाननगर कंकालिनी नगरपालिका १ कोशी ब्यारेज नजिकबाट लागु औषधसहित चारजनालाई बुधबार पक्राउ गरेको छ । प्रहरीको गस्ती टोलीले तीनवटा मोटरसाइकलाई रोकी चेकजाँच गर्दा १९ थान नाइट्राभेट ट्याब्लेट, ६ वटा डाइलेक्स सिरफ फेला पारेको सप्तरी प्रहरीले जनाएको छ ।
मोटरसाइकलमा सवार सप्तरीको कञ्चनरुप नगरपालिका २ बरमझियाका २९ वर्षीय सुरज साह, वडा नम्बर ५ का २१ वर्षीय संजय साह, वडा नम्बर ८ रुपनगरका ३२ वर्षीय दिपेन्द्र श्रेष्ठ र हनुमाननगर कंकालिनी नगरपालिका १ का १९ वर्षीय कालु साहलाई लागु औषधसहित पक्राउ गरेको डीएसपी तिलक भारतीले बताए ।
उनीहरु लागुऔषध सेवन गरी केही लागुऔषध बोकी स.३प ३०१०, को.७ प ९३२ र बा.४३ प ४६१४ नम्बरको मोटरसाइलमा आएका थिए । थप जनशक्ति परिचालित भइ सीमाका सबै खाले नाकाहरु बन्द भए पनि अन्य बाटो प्रयोग गरेर तस्करको आवतजावत भइरहेको स्थानीयले बताएका छन् ।
दिनभर लकडाउनको राम्रै प्रभाव परे पनि रात परेसँगै र बिहान भारतसँग जोडिएका सीमा नाका आसपासमा र बजारमा चहलपहल बढ्ने गरेको छ ।
प्रतिक्रिया दिनुहोस !
