राजविराज : नेपाल र भारत दुवै देशमा लकडाउन छ । सीमानाका बन्द छ । यस्तो बेला मानिसहरू हिँड्डुल गर्न समेत बन्देज छ । कोरोना भाइरस (कोभिड–१९) को संक्रमण रोकथामका लागि सरकारले गरेको लक डाउनको बेलामा समेत तराईका जिल्लामा लागु औषध तस्करी भने भइरहेको छ ।
भारतीय सीमानाका सप्तरीको छिन्नमस्ता गाउँपालिका ६ हाटीमा भारतबाट ल्याउँदै गरेको लागु औषधसहित सप्तरीको विष्णुपुर गाउँपालिका ५ परसाहीका ४५ वर्षीय जोगिन्द्र यादब शुक्रबार पक्राउ परे । यादबले चलाएको को.४ प ४३६८ नम्बरको मोटरसाइकल चेकजाँच गर्दा लागु औषधसहित पक्राउ परेको ईलाका प्रहरी कार्यालय सखडाले जनाएको छ । उनको साथबाट एक सय मिलिलिटरको २२ बोतल डाइलेक्स, १५ वटा नाइट्राभेट ट्याब्लेट, १०/१० वटा स्पास्मो प्रोक्सिभन र नाइट्रोसन ट्याब्लेट फेला परेको थियो ।
दुई दिनअघि प्रहरीले सप्तरीको हनुमाननगर कंकालिनी नगरपालिका १ कोशी ब्यारेज नजिकबाट लागु औषधसहित चार जनालाई पक्राउ गर्यो । प्रहरीको गस्ती टोलीले तीन वटा मोटरसाइकलाई रोकी चेकजाँच गर्दा १९ थान नाईट्राभेट ट्याब्लेट, ६ वटा डाईलेक्स सिरफसहित सप्तरीको कञ्चनरुप नगरपालिका २ बरमझियाका २९ वर्षीय सुरज साह, वडा नम्बर ५ का २१ वर्षीय संजय साह, वडा नम्बर ८ रुपनगरका ३२ वर्षीय दिपेन्द्र श्रेष्ठ र हनुमाननगर कंकालिनी नगरपालिका १ का १९ वर्षीय कालु साहलाई पक्राउ गरेको थियो । उनीहरू लागु औषध सेवन गरी केही लागु औषध बोकी स.३प ३०१०, को.७ प ९३२ र बा.४३ प ४६१४ नम्बरको मोटरसाइलमा आएका थिए ।
यसैबीच सिरहा नगरपालिका–२ हनुमान चोकबाट ९० वटा नाईट्राभेट ट्याब्लेट, ७२ वटा स्पास्मो प्रोक्सीभन ट्याब्लेट र एक सय मिलिलिटरको ६९ बोतल रेफलिनसहित दुई जनालाई बिहीबार प्रहरीले पक्राउ गरेको छ । पक्राउ पर्नेमा स.८ प ५६८७ नम्बरको मोटरसाइकलमा सवार सिरहाको बिष्णुपुर गाउँपालिका–२ का २५ वर्षीय रबिन्द्रकुमार यादव र नराहा गाउँपालिका–५ का २४ वर्षीय रमेशकुमार यादव रहेका छन् ।
परासीको सरावल गाउँपालिका ४ ललितपुरको भित्री सडकखण्डबाट बुधबार भारी मात्रामा लागु औषध ओसारीरहेको अवस्थामा प्रहरीले युपी १६ एच ७५७१ नम्बर प्लटेको भारतीय मोटरसाइकलसहित एक कारोबारीलाई पक्राउ गर्यो । तरकारी किन्ने बहानामा भारतको लक्ष्मीपुरबाट मोटरसाइकलमा लुकाएर लागु औषध नेपाल छिराउँदै गरेका बर्दघाट नगरपालिका १३ भटौलियाका ५९ बर्षीय सुरेन्द्र चमारलाई प्रहरीले पक्राउ गरेको हो ।
चमारको साथबाट ५७६ ट्याब्लेट स्पास्मो प्रोक्सिभन, ६ सय ट्याब्लेट नाइट्रोभेट, ७० बोतल ओनरेक्स फेला परेको प्रहरीले जनायो । जिल्ला प्रहरी कार्यालय बाँकेले चैत २१ गते भारतबाट नेपाल आउँदै गरेका बाँकेको नेपालगन्ज–२० राँझाका दिलिप बर्मालाई पनि एक सय मिलिलिटरको ९६ थान कोरेक्ससहित पक्राउ गर्यो ।
यसरी लकडाउनको समयमा सीमा क्षेत्रमा कडाइ गरिए पनि लागु औषध ओसार्ने कार्य भइरहेको छ । थप जनशक्ति परिचालित भइ सीमाका सबै खाले नाकाहरु बन्द भए पनि चोरबाटो प्रयोग गरेर तस्करको आवतजावत भइरहेको स्थानीयले बताएका छन् । दिनभर लकडाउनको राम्रै प्रभाव परे पनि रात परेसँगै र बिहान भारतसँग जोडिएका सीमा नाका आसपासमा र बजारमा चहलपहल बढ्ने गरेको छ । सप्तरीको बोदे बसाइनका उमेश साहका अनुसार लागु औषध सेवनकर्ता र तस्कर खुलेआम भारतीय सीमाका बजार पुगिरहेका छन् ।
प्रतिक्रिया दिनुहोस !
