म्याग्दीमा र्यापिड टेष्ट सुरु, ३३ को कोरोना रिपोर्ट 'नेगेटिभ'
चैत ३०, २०७६ आइतबार १०:३८:०
बेनी म्याग्दीमा विदेशबाट आएकालाई कोरोना भाइरसको द्रूत परीक्षण (र्यापीड टेष्ट) गर्न थालिएको छ । स्वास्थ्य कार्यालय म्याग्दीले शनिबार बेनी नगरपालिकाका ३३ जनाको कोरोना परीक्षण गरेको थियो ।
'सबैमा कोरोना संक्रमण नभएको रिपोर्ट आएको छ,' स्वास्थ्य कार्यालयका प्रमुख एकनारायण लम्सालले भने,'एकान्तबासमा बसेकाको स्वास्थ्यमा समस्या नदेखिए पनि सम्भावित जोखिमलाई आंकलन र सुरक्षित बनाउन परीक्षण गरिएको हो ।'
यसअघि २०७६ चैत १ गतेदेखि विदेशबाट आएकालाई १५ दिनसम्म क्वारेन्टिन (एकान्तबास)मा राखेर घर पठाइएको थियो । जिल्लामा एक महिनायता भारत, खाडी, एशीयाली र युरोपका देशबाट करिब १४० जना भित्रिएको तथ्याङ्क छ ।
स्वास्थ्य मन्त्रालयमार्फत किट आएपछि बेनी अस्पतालका चिकित्सक र स्वास्थ्यकर्मीको टोलीले परीक्षण सुरु गरेका हुन् । द्रूत परीक्षण गर्दा १५ मिनेटमै रिपोर्ट प्राप्त हुन्छ ।
स्थानीय तहमै र्यापिड टेष्ट
गण्डकी प्रदेश सरकारले एक महिनायता नेपाल आएका प्रदेशभरका तीन हजार ७५० जनाको रयापिड टेष्ट गर्ने जनाएको छ । चिकित्सक र स्वास्थ्यकर्मी स्थानीय तहमै पुगेर परीक्षण गर्ने भएका छन् ।
म्याग्दीको धवलागिरी र मालिका गाउँपालिकामा आइतबार, मंगलबार ,सोमबार, अन्नपूर्णमा मंगलबार र रघुगंगा गाउँपालिकामा बुधबार विदेशबाट आएकालाई लक्षित गरेर परीक्षण गरिने स्वास्थ्य कार्यालयले जनाएको छ ।
परीक्षणका क्रममा पोजेटिभ देखिएको अवस्थामा पुन परीक्षणका लागि ल्याबमा पठाइने बेनी अस्पतालका चिकित्सक मनोज घिमिरेले बताए । हालसम्म म्याग्दीमा कसैलाई पनि कोरोनाको संक्रमण भएको छैन् । यसअघि बेनी अस्पतालबाट ४ जनाको स्वाब परिक्षणका लागि पठाइएको थियो । चारैजनाको नजिता नेगेटिभ आएको थियो ।
एम्बुलेन्समा क्याबिन
कोरोना शंकास्पद बिरामीलाई अस्पताल ल्याउन क्याबीन भएको छुट्टै एम्बुलेन्सको व्यवस्था गरिएको छ । ती एम्बुलेन्स भित्र चालक, बिरामीका आफन्त बस्ने र बिरामी राख्ने छुट्टा छुट्टै क्याबिन बनाइएको छ । बिरामीलाई सुरक्षित रुपमा अस्पताल पुर्याउन तथा चालक र आफन्तलाई संक्रमणको जोखिमबाट बचाउन एम्बुलेन्समा क्यावीन बनाइएको हो ।
कोभिड-१९ सम्बन्धी कमाण्ड पोष्टको निर्णय अनुसार नेपाल रेडक्रस सोसाइटी म्याग्दी शाखाका उपमन्त्री सुरत केसीको संयोजकत्वमा पाँच सदस्यीय बिरामीलाई अस्पताल सम्म ल्याउने प्यासेन्ट रिसिभिङ टिम गठन भएको छ । टोलीको सदस्यमा श्रीबक्स गुल्म, जिल्ला प्रहरी कार्यालय, जिल्ला स्वास्थ्य कार्यालय र शसस्त्र प्रहरी गुल्म गलेश्रका प्रतिनिधि रहेका छन् ।
पोखरेबगरमा सहायता कक्ष
अन्नपूर्ण गाउँपालिकाको पोखरेबगरमा कोरोना भाइरस भित्रन नदिन सहायता कक्ष र फिबर क्लिनिक सुरु गरेको छ । गाउँपालिकामा भित्र्ने र पोखरेबगर भएर मुस्ताङ जाने आउनेको स्वास्थ्य परीक्षण गर्ने, परामर्श र औषधि उपचार सेवा उपलब्ध गराउन सहायता कक्ष सञ्चालन गरिएको हो । सहायता कक्षामा एक जना अहेव र एकजना अनमी खटाइएको गाउँपालिकाका स्वास्थ्य शाखा संयोजक समुन्द्र बरुवालले बताए ।
सहायता कक्षमा ज्वरोको बिरामीको उपचारका लागि फिबर क्लिनिक समेत सञ्चालन गरिएको छ । स्वास्थ्यकर्मीलाई ज्वरो नाप्ने थर्मल गन पनि उपलब्ध गराइएको छ । बेनी-जोमसोम सडक अन्तरगत पर्ने पोखरेबगर अन्नपूर्ण गाउँपालिकाको केन्द्र हो । सहायता कक्ष र क्लिनिक सञ्चालन गर्न पोखरेबगरकी सुजिना पुनले लकडाउनको अवधिभरका लागि निशुल्क सटर उपलब्ध गराएकी छिन् ।
नाकामा चेकपोष्ट
कोरोना रोकथामका लागि गरिएको लकडाउन कार्यान्वयन र कोरोना भित्रन नदिन सतर्कताका लागि रघुगंगा गाउपालिको मुख्य नाकामा स्वास्थ्य परिक्षणको सुबिधा सहितको सहायता कक्ष स्थापना भएको छ । अन्नपूर्ण गाउँपालिकाको सिमानामा रहेको तिप्ल्याङ, बेनी नगरपालिकाको सीमामा रहेको गलेश्वर र झिंमा सहायता कक्ष स्थापना गरिएको रघुगंगा गाउँपालिकाका अध्यक्ष भवबहादुर भण्डारीले बताए ।
सहायता कक्षमा स्वास्थ्यकर्मी, सुरक्षाकर्मी र स्वयमसेवक खटाइएको छ । उनिहरुले नाकाबाट भित्रने र बाहिरिनेको तथ्याङ्क राख्ने, थर्मल गनले ज्वरो जाँच गरेका छन् । ज्वरो नाप्ने थर्मल गन र व्यक्तिगत सुरक्षा सामग्री पीपीईको समेत व्यवस्था गरिएको हो ।
बिरामीलाई घरमै औषधि
मंगला गाउँपालिकाले कोरोना रोकथामका लागि गरिएको लकडाउनको अवधिभर नियमित सेवन गर्ने औषधी सम्बन्धित बिरामीको घरमै उपलब्ध गराउने व्यवस्था मिलाएको छ । लकडाउनका कारण सार्वजनिक यातायातका साधन नचल्ने हुँदा बिरामीले नियमित सेवन गर्ने औषधी नछुटोस भनेर स्वमसेवकको व्यवस्था गरेर घरमै औषधी उपलब्ध गराएको हो । मुटु, प्रेसर, सुगर जस्ता रोगका बिरामीहरुको औषधी पुर्याउन बाबियाचौरका बिनोद खत्रीलाई खटाइएको गाउपालिकाका अध्यक्ष सतप्रसाद रोकाले बताए ।
बिरामी वा आफन्तले खत्रीको ९८४७७७२२०५ नम्बरको मोबाइलमा सम्पर्क गरेर आफूले सेवन गर्ने औषधिको नाम टिपाउने गर्छन् । सामाजिक सञ्जालको पहुँचमा भएकाले तस्बिर खिचेर पठाउँछन् । सोही आधारमा केसीले सदरमुकाम बेनी र बाबियाचौरको औषधि पसलबाट खरि गरेर उनीहरुको घरमै पुर्याउने गरेका छन् ।
प्रतिक्रिया दिनुहोस !
