बेनी : विश्वब्यापी महामारीको रुपमा फैलिएको कोभिड–१९ (कोरोना) भाइरसको त्रास र रोकथामका लागि गरिएको लकडाउनका कारण रोकिएको म्याग्दीका जलविद्युत आयोजना निर्माण करिब तीन सातापछि सुचारु भएको छ । स्थानीय प्रशासन, सुरक्षा निकाय, जनप्रतिनिधि, समुदाय र ठकेदार कम्पनीहरूसंग समन्वय गरी सुरक्षाको उपाय अपनाएर जलविद्युत आयोजना निर्माणलाई अघि बढाएका हुन् ।
निर्माण सामग्री, उपकरण, इन्धन र मजदुर भएका जलविद्युत आयोजना निर्माणलाई निरन्तरता दिइएको सिडिओ ज्ञाननाथ ढकालले बताए । ‘मजदुर र मेटेरियल भएका आयोजनालाई सूचारु गराएका छौँ,’ उनले भने, ‘निर्माण सामग्री र कच्चा पदार्थ आयातका लागि प्रदेश र संघीय सरकारमा पहल गरेका छौँ ।’
उनका अनुसार ४० मेगावाट क्षमताको राहुघाट, ४२ मेगावाट क्षमताको मिस्त्रिखोला र १४ मेगावाटको घारखोला जलविद्युत आयोजना निर्माणलाई निरन्तरता दिइएको छ । २२० केभी क्षमताको दाना सबस्टेशन र प्रशारण लाइन आयोजनाले पनि रोकिएको कामलाई निरन्तरता दिन लागेको छ ।
नेपाल विद्युत प्राधिकरणले बनाइरहेको सबस्टेशन र प्रशारण लाइन बैशाख महिनाभित्र चार्ज गर्ने तयारी छ । स्थानीय सरोकारवाला र समुदायको सहमतिमा आयोजनाको काम सुचारु गरिएको नेपाल विद्युत प्राधिकरणद्वारा सञ्चालित राहुघाट जलविद्युत आयोजनाको प्रर्वद्धक रघुगंगा हाइड्रोका प्रशासकीय अधिकृत मदन गिरीले जानकारी दिए ।
भारतीय ठेकेदार कम्पनी जयप्रकाश (जे.पी) एसोसियट्सका पाँच सय जना मजदुरहरु आयोजनामा परिचालित छन् । चैत ११ देखि करिब तीन हप्तासम्म आयोजनाको काम रोकीएको थियो । काम नहुँदा मजदुरहरु क्याम्पमा बसेका थिए । ‘मजदुर, उपकरण र निर्माण सामग्री भएकाले समुदायमा असर नपुग्ने गरेर सुरक्षा सतर्कता अपनाएर काम अघि बढाएका हौँ,’ रघुगंगा हाइड्रोका प्रबन्ध सञ्चालक गणेश केसीले भने, ‘प्रशासन, सुरक्षा निकाय, गाउँपालिका, ठेकेदार र समुदायसंग समन्वय गरेका छौँ ।’
अन्नपूर्ण गाउँपालिकाको नारच्याङ स्थित ११० मेगावाट क्षमताको निलगिरी र निलगिरी क्यासकेट, ४२ मेगावाटको मिस्त्री, १४ मेगावाटको घारखोला जलविद्युत आयोजना निर्माणाधीन छन् । रघुगंगा गाउँपालिकामा ३७.५ मेगावाटको राहुघाट मंगले जलविद्युत आयोजनाको पहुँचमार्ग निर्माण भैरहेको छ ।
मालिका गाउँपालिकामा २५ मेगावाट क्षमताको दरवाङ म्याग्दीखोला जलविद्युत आयोजना, डाँडाखेत र रातोढुङ्गा सब स्टेशन निर्माणाधीन छन् । धवलागिरी गाउँपालिकामा ५० मेगावाटको म्याग्दीखोला जलविद्युत आयोजनाको पहुँचमार्ग निर्माण भैरहेको छ ।
मजदुर, प्राविधिक र कर्मचारी घर गएकाले निलगिरिखोला जलविद्युतको काम भने रोकिएको छ । निर्माणको अन्तिम चरणमा रहेको मिस्त्रीखोलाको बाँध, टनेल, पेनस्टक परीक्षण र पावर हाउसमा उपकरण जडान भैरहेको छ । बेनी–जोमसोम, पोखरेबगर–घार, बेनी–दरवाङ, रत्नेचौर–बेनी सडक आयोजनाको काम भने रोकीएका निर्माण ब्यवसायी संघ म्याग्दीका अध्यक्ष नारायण जिसीले बताए । सडक, सिचाई, नदी नियन्त्रण र भवनका योजनामा काम गर्ने धेरै मजदुरहरु घर गएका छन् ।
प्रतिक्रिया दिनुहोस !
