बेनी : कोरोना भाइरस रोकथामका लागि गरिएको लकडाउन (बन्दाबन्दी)को समयमा शिक्षकलाई अनलाइनबाट तालिम सञ्चालन गरिएको छ । एकीकृत अखिल नेपाल शिक्षक संगठनले ‘भर्चुअल’ माध्यमबाट देशका विभिन्न ठाउँमा रहेका शिक्षकलाई सम्पर्कमा जोडेर प्रविधिमैत्री तालिम सञ्चालन गरेको हो ।
संगठनको पोखरा महानगर कमिटीले प्रदेश र केन्द्रीय समितिसँग समन्वय गरेर वैशाख ६ गतेदेखि तालिम सञ्चालन गरिरहेको छ । बन्दाबन्दीका कारण घरमै बसेका शिक्षकको क्षमता विकासका लागि प्रविधिको प्रयोग गरेर तालिम सञ्चालन गरिएको संगठनका गण्डकी प्रदेश कमिटी अध्यक्ष सोमनाथ ढुङ्गानाले जानकारी दिए ।
‘शिक्षकलाई प्रविधिमैत्री बनाउन बन्दाबन्दीको फुर्सदको समयलाई सदुपयोग गरिएको छ,’ उनले भने ‘शिक्षकको क्षमता विकास गरी शिक्षण विधिमा परिवर्तन र विद्यार्थीको सिकाइ उपलब्धि बढाउने उद्देश्यले अनलाइनबाट तालिम चलाएका हौँ ।’
शिक्षकहरुलाई नवीनतम शिक्षण विधि र प्रविधिको विषयमा विषय विशेषज्ञहरुले घरबाटै प्रशिक्षण दिने व्यवस्था मिलाएको संगठनका महानगर समितिका अध्यक्ष भुवन सुवेदीले बताए ।
जुम एप्लीकेशन प्रयोग गरेर हरेक दिन दिउँसो १ बजेदेखि ४० मिनेटसम्म तालिम सञ्चालन गरिएको छ । तालिमको चौथो दिनसम्म ८० जना शिक्षक आवद्ध भएका छन् । पहिलो दिन प्रविधिमैत्री शिक्षक समाजका महासचिव देवीप्रसाद शर्माले प्रविधिमैत्रि शिक्षक र प्रविधिमैत्री विद्यार्थी शीर्षकमा सहजीकरण गरेका थिए ।
दोस्रो दिन डिजिटल लाइब्रेरीको प्रयोगका विषयमा सुशील उप्रेतीले तालिम दिए । तेस्रो दिनको तालिममा छवी आचार्यले माइक्रोसफ्ट एक्सलको प्रयोगका विषयमा जानकारी गराएल। चौथो दिन खुल्ला विश्वविद्यालयका प्राध्यापक डाक्टर लेखनाथ शर्माले विद्यालय तहमा खुल्ला शिक्षाको सम्भावना र चुनौतिका विषमा प्रशिक्षण दिएका थिए ।
पावर पोइन्ट, मल्टीमिडिया, टेलीटिचिङ आदी माध्यमको विषयमा पनि प्रशिक्षण दिइने संगठनले जनाएको छ । तालिममा सहभागी म्याग्दीका शिक्षक मुक्ति पौडेलले घरमै बसेर नयाँ शिक्षण बिधिको बारेमा सिक्ने अवसर पाएको बताए ।
बन्दाबन्दीमा बसिरहेका शिक्षकहरुको समयको सदुपयोगसँगै विद्यालय बन्द रहेको अवस्थामा कसरी विद्यार्थीलाई प्रविधिको प्रयोग मार्फत् शिक्षण गर्न सकिन्छ भन्ने विषयमा सञ्चालन गरिएको तालिम प्रभावकारी देखिएको छ ।
शिक्षकहरुलाई सञ्चालन गरिएको भर्चुअल तालिममा सहभागिहरु । तस्बिर अन्नपूर्ण
प्रतिक्रिया दिनुहोस !
