राजविराज : मानिस साथीको लागि ज्यान दिन तयार हुन्छन् । सप्तरी हनुमाननगर कंकालिनी नगरपालिका–१ भारदहका १६ वर्षीय सुरज साह स्वर्णकारलाई भने त्यसो भएन । साथीहरूले नै मार्लान् हत्या गर्लान् भन्ने सायदै उनले सोचेका थिए । तर, विडम्बना, लागु औषधको नशा सेवनका बेला भएको सामान्य विवादमा तीन जना साथीले मिलेर सुरजको हत्या गरे ।
हत्या आरोपमा भारदहका सुजितकुमार मुखिया, टिल्का भनिने चन्द्रशेखर मण्डल र प्याप्या भनिने कृष्णकुमार मुखिया पक्राउ परेपछि हत्याको रहस्य खुलेको छ । पक्राउ परेका आरोपितहरूविरुद्ध बुधबार जिल्ला अदालतबाट १५ दिनको म्याद लिइ थप अनुसन्धान भइरहेको इलाका प्रहरी कार्यालय कञ्चनरूपले जनाएको छ ।
उनीहरूमाथि कारवाही माग गर्दै मृतक सुरजका बुवा जानो साह स्वर्णकारले दिएको उजुरी बुधबार दर्ता गरिएको छ । फलामको गह्रुँगो हतियारले कुटपिट गरेर हत्या गरिएको अवस्थामा सुरजको शव वैशाख १ गते भारदहस्थित कोशी नदीको पश्चिमतर्फको बाँधको बाटो छेउको झाडीमा फेला परेको थियो । घटनाबारे अनुसन्धान गर्न धनुषाको प्रहरी चौकी लालगढबाट वैशाख १ गते तालिम प्राप्त कुकुर मगाइयो । लकडाउन कार्यान्वयनमा व्यस्त रहेको प्रहरीले मृतकका मिल्ने नजिकका साथीहरूलाई निगरानीमा राखेकाले घटनाको रहस्य खुलेको एसपी कृष्ण प्रसाईले बताए ।
घटना यसरी भयो
लकडाउनका कारण चैत ३० गते सम्साँझै सुनसान थियो । प्रहरीका अनुसार नयाँ वर्षको अघिल्लो रात चारजना साथीहरूले कुखुरालगायत चोरी गरेर नयाँ वर्षमा रमाइलो गर्ने योजना बनाए । राति खाना खाएपछि योजना अनुरूप चोरीका लागि ताला फुटाउने कटर, खुकरी र समान ओसार्न चाहिने बोरा ल्याउने जिम्मा सुरजको थियो । गाउँकै बगैचामा भेला भएपछि सबैले गाँजा र सोनपिच नामक सुलेसन (नशा) सेवन गरे ।
चोरी गर्ने योजना बमोजिम कंकालिनी मन्दिर भारदह अगाडि चोकमा बसेका बेला सुजितले जिस्किएर ‘ढिला भइसक्यो, चोरी गर्न जाऔं’ भन्दै सुरजको टाउकोमा कटरले विस्तारै प्रहार गरेको जोडले लागेछ, उनी ढले । नशामा बेहोस भएका सबैले लात र फलामको कटरले हिर्काएपछि सुरजको मृत्यु भएको ठानी उनीहरूले बोरामा कसेर पालैपालो बोकेर कोशी बाँधको बाटो छेउ खेतको बाटो हुँदै भलुवातर्फ लगे ।
पक्राउ परेका आरोपितहरूले प्रहरीसँगको प्रारम्भिक बयानमा बोराभित्र चलमलाएपछि जिउँदै रहेको ठानी खुकुरीले टाउको र अनुहारमा प्रहार गरेर हत्या गरेको र बाटो छेउमै झाडीमा फालेको बताएका छन् । भाग्ने क्रममा उनीहरूले बोरामा आगो लगाएर हिंडे । हत्यामा प्रयोग भएको खुकुरी हँसिया दहको पानीमा मिल्काए । गाउँदेखि पश्चिमतर्फ निर्माणाधिन घर छेउ रहेको झुग्गीमा तीनै जना भेला भई पुनः सुलेसन सेवन गरे । फलामको कट्टर आकर्षक भएको र जस्तो सुकै ताला पनि फुटाउने भएकाले आरोपितहरू लोभिए र जुग्गीमा कपडाले छोपेर लुकाएर राखे ।
चैत ३० गते सुरजलाई लिन गएका बेला सुरजकी आमाले सडकमा कृष्णलाई देखेकी थिइन । यो कुरा कृष्णलाई थाहा थिएन। उनीहरूले जलाएको बोरा पुरै जल्न पाएन् । इलाका प्रहरी कार्यालय कञ्चनरूपका डिएसपी मकेन्द्रकुमार मिश्रले भने,‘हत्या स्विकारेका आरोपितहरूले बताए अनुसार खुकुरी, आधा जलेको बोरा, डोरी, ताला फुटाउने कटर फेला परेको छ ।’ मिल्ने साथीहरूका बीच पहिले कुनै मनमुटाव नभएको र नशाको बेहोसीमा दुर्घटना भएको वयान दिएकाले लागु औषध नै हत्याको मुख्य कारण भएको डिएसपी मिश्रले बताए ।
प्रतिक्रिया दिनुहोस !
