बेनी : घरमा अवैध गोली (बुलेट) भेटिएपछि प्रहरी हिरासतमा म्याग्दीको रघुगंगा गाउँपालिका ६ पाखापानीका वडा अध्यक्ष मनकुमार शेरपुजा धरौटीमा छुटेका छन् । जिल्ला अदालत म्याग्दीका न्यायाधीश माधवेन्द्रराज रेग्मीको मंगलबारको इजलासले शेरपुजालाई धरौटीमा छोड्न आदेश दिएको थियो ।
२०७६ चैत ३० गते शेरपुजाको घरमा खानतलासी गर्दा प्रहरीले एक थान बारबोरको गोली बरामद गरेको थियो । सामाजिक सञ्जाल फेसबुकमा शेरपुजाले आफूसँग गोली रहेको स्टाटस राखेपछि प्रहरीले घर खानतलासी गरेको थियो ।
हातहतियार राख्ने अनुमति नलिएका शेरपुजाको साथमा रहेको गोली अवैध भएको पुष्टि भएपछि प्रहरीले हात हतियार तथा खरखजना मुद्दा चलाएको थियो । अदालतको आदेशअनुसार शेरपुजा दुई लाख पचास हजार रुपैयाँ धरौटी बुझाएर छुटेका म्याग्दी जिल्ला अदालतका श्रेष्तेदार खिलप्रसाद बुर्लाकोटीले बताए ।
जिल्ला सरकारी वकिल कार्यालयले शेरपुजाविरुद्ध सात वर्ष कैद र ७० हजार जरिवानाको माग दावी गरेको थियो । शेरपुजा वैशाख २१ गते प्रहरी कार्यालयमा उपस्थित भएका थिए ।
शेरपुजा २०७४ वैशाखमा भएको स्थानीय तह निर्वाचनमा नेपाली कांग्रेसबाट उमेद्वार बनेका थिए । स्थानीय चुनाव अघि नेपाली कांग्रेसमा प्रवेश गरेका शेरपुजा कांग्रेसको रघुगंगा पालिका कार्यसमितिको सचिव समेत हुन् ।
२०७० को दोस्रो संविधानसभा निर्वाचनमा उनी मोहन वैद्य नेतृत्वको नेकपा माओवादी क्रान्तिकारीमा आवद्ध थिए ।
प्रतिक्रिया दिनुहोस !
