राजविराज : सप्तरीको कञ्चनरुपमा मंगलबार मृत्यु भएकी गर्भवतीको पीसीआर रिपोर्ट नेगेटिभ आएको छ।कञ्चनरुप नगरपालिका-११ गोरपारकी २४ वर्षीया गर्भवती ममतादेवी माझीको पीसीआर रिपोर्ट नेगेटिभ आएको वीपी कोइराला स्वास्थ्य विज्ञान प्रतिष्ठान धरानले जनाएको छ ।
कोरोनाको संक्रमणले मृत्यु भएको आशंकापछि त्रसित जनजीवन रिपोर्ट नेगेटिभको खबर आएसँगै सामान्य बन्दै गएको स्थानीयले बताएका छन्। उच्च ज्वरो, खोकी, पखाला र श्वासप्रश्वासमा समस्या देखिएपछि कोरोना आशंकामा मृतकको स्वाब संकलन गरी मंगलबार प्रतिष्ठान पठाइएको थियो ।
मृतक महिलाको पीसीआर परीक्षणको रिपोर्ट नआउँदै मंगलबार शव व्यवस्थापन गरिएको थियो । कोरोना संक्रमित हुन सक्ने सम्भावनाका कारण छिटो शव व्यवस्थापन गर्नुपर्ने भएकाले मंगलबार नै 'शव व्यवस्थापनसम्बन्धी संक्षिप्त कार्यविधि २०७६' अनुसार दाहसंस्कार गरिएको थियो ।
मृतकको स्वाब धरान पठाएपछि उनको प्रत्यक्ष सम्पर्कमा आएका चिकित्सक, परिवारका सदस्य र दाहसंस्कारमा संलग्न व्यक्ति सेल्फ क्वारेन्टाइनमा बसेका थिए ।
'छिमेकी गाउँ-टोलमा समेत त्रास फैलिएको थियो,' नगर प्रमुख बसन्त मिश्रले भने, 'कोरोना भाइरसको जस्तो लक्षण देखिएपछि आशंका गरेर सर्तकता अपनाए पनि कोरोना संक्रमण नभएको खबरले त्रास कम हुँदै गएको छ ।'
दश दिनदेखि अत्यधिक ज्वरो, खोकी र श्वासप्रश्वासमा समस्या देखिएकी १८ साताकी गर्भवतीको घरमै मृत्यु भएको थियो । परिवारका सदस्यले गत बिहीबार राजविराज ल्याएर डा. विनिता यादवको क्लिनिकमा गर्भ जाँच गराएका थिए।
प्रतिक्रिया दिनुहोस !
