बेनी : आगोलागीबाट म्याग्दीको अन्नपूर्ण गाउँपालिका–३ मा रहेको दाना आयुर्वेद औषधालयको भवन ध्वस्त भएको छ । आइतबार बिहान भएको आगोलागीबाट तीनकोठे भवन जलेर ध्वस्त भएको हो ।
एक तले भवनको पर्खालसमेत भत्किएको स्थानीयबासी इन्द्रसिंह शेरचनले बताए । स्थानीयबासीहरुले आगोलागी नियन्त्रणमा लिएका थिए । जीर्ण र भत्कने अवस्थामा पुगेको भवन केही वर्षदेखि प्रयोगमा थिएन ।
भवनको एक कोठामा मानसिक समस्या भएकी महिला बस्दै आएकी थिइन् । औषधालय भने केही वर्षयता दाना स्थित भाडाको घरबाट सञ्चालन गरिंदै आएको थियो । भवनमा आगोलागी भएको विषयमा जानकारी गराए पनि दाना प्रहरी चौकी र औषधालयका कर्मचारीले बेवास्ता गरेका स्थानीयले गुनासो गरेका छन् ।
सोही जीर्ण भवन मर्मत र कम्पाउण्ड पर्खाल निर्माणमा अनियमितता भएपछि संलग्नलाई अख्तियार दुरुपयोग अनुसन्धान आयोगले विशेष अदालतमा यही जेठ ८ गते मुद्दा दायर भएको थियो । जिल्ला आयुर्वेद स्वास्थ्य केन्द्रका तत्कालीन निमित्त प्रमुख रमेश शर्मा भुषाल, दुई जना इञ्जिनियर र दुई जना निर्माण ब्यवसायी विरुद्ध मुद्दा चलाएको केही दिनमै भवनमा आगोलागी हुनमा शंका उब्जिएको स्थानीय गंगा पुनले बताए ।
भुषालसहित भवन निर्माण विभाग डिभिजन कार्यालय, बागलुङ्गका तत्कालीन डिभिजन प्रमुख तेजेन्द्र शर्मा पौडेल र इन्जिनियर सुदिप खड्का, शुभकामना निर्माण सेवाको सञ्चालक सरिता सुवेदी र अधिकारनामा लिइ निर्माण कार्यमा संलग्न रघुनाथ शर्माविरुद्ध मुद्दा दायर भएको थियो ।
उनीहरुविरुद्ध जनही रु. एक लाख ४५ हजार ९२८ का दरले बिगो दावीसहित मुद्दा चलाइएको अख्तियारले जनाएको छ । आर्थिक वर्ष २०७४/७५ मा औषधालयको भवन मर्मत र घेराबार पर्खाल निर्माणमा खरिद प्रक्रिया विपरित मिलेमतो गरि अनियमितता भएको उजुरी परेको थियो ।
शुभकामनासहित झी र श्रमजीवी निर्माण सेवा गरी ३ वटा निर्माण व्यावसायीसँग कार्यालयले दरभाउपत्र माग गरेको देखाउन खोजेप नि निर्माण व्यावसायीहरूले पेश गरेको निवेदनको मिति तथा उक्त निवेदन कार्यालयमा दर्ता गर्दाको मितिमा केरमेट र सच्चाइएको अनुसन्धानका क्रममा खुलेको थियो ।
प्रतिक्रिया दिनुहोस !
