मुगु : केही दिनबाट लगतार वर्षा हुन थालेपछि पाटन क्षेत्रको पलास्टिक पालको क्वारेनटाइनमा राखिएकालाई विद्यालयको भवनमा सारिएको छ । खत्याड गाँउपालिका—५ हलेखाडाम तरकारी फलाउन प्रयोग गरिने ग्रिन हाउसको पलास्टिकले बनाएको क्वारेन्टाइन राखिएकालाई केही दिनदेखि लगतार वर्षा हुन थालेपछि सोही गाँउपालिका—७ मा रहेको लोकप्रिय माद्यामिक विद्यालयको भवनमा सारिएको हो ।
बिहीबार बसेको कार्यपालिकाको बैठकले सोही गाँउपालिका—१ सेरी मसानेको चौरमा सुविधायुक्त क्वारेन्टाइन बनाइ हलेखाडा र छोटेका क्वारेन्टाइनमा बस्दै आएकालाई सार्ने जिम्मा वडा नं २ का वडा अध्यक्षलाई लालबहादुर मल्ललाई दिइएको थियो । कार्यपालिकाले गरेको निर्णयविपरित गाँउपालिकाले शुक्रबार राती हलेखाडाबाट रातारात मान्छे ल्याएर गाँउको बिचमा रहेको विद्यालयमा राखेपछि स्थानीयले शनिबार बिहानैदेखि विरोध गरेका थिए ।
शनिबार बिहानदेखि विरोध भएपछि गाँउपालिका अध्यक्षले गाँउलेलाई सम्झाइबुझाइ गरेपछि गाँउले शनिबार दिउँसो एक बजे सहमतीमा आएका थिए । गाँउले र गाँउपालिका अध्यक्षबिच लोकप्रिय माध्यमिक विद्यालयलाई क्वारेन्टाइनको रुपमा प्रयोग गर्न सहमती भएको वडा नं ७ का वडा अध्यक्ष जयऋषि उपाध्यायले जानकारी दिए ।
हलेखाडा क्वारेनटाइनमा राखिएका ४७ जनालाई विद्यालयमा सारेको भए पनि छोटे क्वारेन्टाइन राखिएकालाई गाँउपालिकाले अन्यत्र सार्ने व्यवस्था गरेको छैन । खत्याड गाँउपालिकाले व्यवस्थापन गरेका हलेखाडा र छोटे भन्ने स्थान पाटन क्षेत्रमा पर्छन् । आकाशमा बादल देखिनेबित्तिकै वर्षा सुरु हुने स्थान र अत्याधिक चिसो हुने स्थान हो ।
जेठ ६ गते भारतबाट नेपालको वनबसा नाका हुँदै आएका उनीहरुलाई खत्याड गाँउपालिकाले ८ गतेबाट पालको क्वारेन्टाइन बनाइ राख्दै आएको थियो । सोहि क्वारेन्टाइनमा बस्दै आएका ४८ जनामध्ये १ जनामा कोरोना भाइरस पोजिटिप रिपोट आएको थियो ।
प्रतिक्रिया दिनुहोस !
