राजविराज : सप्तरीको कञ्चनरुप नगरपालिकामा सोमबार साँझ दुई जनामा कोरोना संक्रमण देखिएको छ ।
बीपी कोइराला स्वास्थ्य विज्ञान प्रतिष्ठान धरानमा भएको परीक्षणमा कञ्चनरुप नगरपालिका ८ का ३० र ३५ वर्षीय पुरुषमा कोरोना संक्रमण देखिएको स्वास्थ्य कार्यलय सप्तरीले जनाएको हो । उनीहरुमध्ये एक जना भारतको जयपुर र अर्का भारतको हरियाणाबाट आएका हुन् ।
सर्वाेदय मावि कञ्चनरुपस्थित क्वारेन्टाइनका ४१ जना र महेन्द्र जनता मावि बलुवा सितापुर घोघनपुरस्थित क्वारेन्टाइनका २७ जना गरी गत शुक्रबार ६८ जनाको स्वाब संकलन गरिएको थियो ।
उनीहरुलाई सोमबार राति राजविराजस्थित आइसोलेशन सेन्टरमा पठाउने तयारी भइरहेको नगरपालिकाका स्वास्थ्य सहसंयोजक सिनियर अहेव अधिकृत डम्बरप्रसाद गुप्ताले बताए । कञ्चनरुपमा संक्रमण पुष्टि भएपछि सप्तरीमा संक्रमित हुने स्थानीय तह १३ पुगेको छ ।
यसैगरी राजविराज नगरपालिका ९ का एक जना थप संक्रमित पुष्टि भएको स्वास्थ्य कार्यालय सप्तरीले जनाएको छ । सोमबार दिउँसो राजविराज नगरपालिका १, ११ र १३ नम्बर वडाका ६ जनामा कोरोना संक्रमण पुष्टि भएको थियो । सप्तरी जिल्लामा संक्रमितको संख्या १ सय २ पुगेको छ । कोरोना संक्रमितहरुमध्ये २ वर्षीया वालिका, १७ र १८ वर्षीया किशोरीसहित ६ जना महिला रहेका छन् ।
प्रतिक्रिया दिनुहोस !
