राजविराज : सप्तरीमा बिहीबार एक प्रहरीसहित ९ जनामा कोरोना संक्रमण देखिएको छ। वीपी कोइराला स्वास्थ्य विज्ञान प्रतिष्ठान धरानमा गरिएको पीसीआर परीक्षणमा बोदेबर्साइन नगरपालिकाका ३ जना र हनुमाननगर कंकालिनी नगरपालिकाका ६ जनामा कोरोना संक्रमण देखिएको स्वास्थ्य कार्यालय, सप्तरीले जनाएको छ ।
स्वास्थ्य कार्यालयका वरिष्ठ मलेरिया इन्स्पेक्टर नारायणप्रसाद राउत बरैले बोदेबर्साइन नगरपालिका ५ मा २२ र ३५ वर्षीय तथा वडा नम्बर ९ का ५० वर्षीय पुरुषमा कोरोना संक्रमण देखिएको जानकारी दिए ।
यस्तै बोदेबर्साइन नगरपालिका ५ स्थित चन्द्रा माध्यमिक विद्यालयमा संक्रमण पुष्टि भएका २२ वर्षीय पुरुष प्रहरी हुन् । क्वारेन्टाइनको सुरक्षार्थ खटिएका प्रहरी सिरहाको सुखीपर-१० का बासिन्दा हुन् । अन्य २ जना भारतको दिल्ली र चण्डीगढबाट आएको स्वास्थ्य संयोजक बैद्यनाथ साहले बताए ।
यो सहित संक्रमित हुने प्रहरीको सङ्ख्या ३ पुगेको छ । बोदेबर्साइन नगरपालिका-५ स्थित चन्द्रा माविकै क्वारेन्टाइनमा खटिएका एक प्रहरीमा जेठ १५ गते र सुरुङ्गा नगरपालिकास्थित मसिलाल जनता मावि कुशहाको क्वारेन्टाइनमा खटिएका २९ वर्षीय असईमा जेठ १४ गते संक्रमण पुष्टि भएको थियो ।
यसैगरी बिहीबार नै हनुमाननगर कंकालिनी नगरपालिका-१ का ३५ वर्षीय, वडा नम्बर ४ का २३ र २३ वर्षीय, वडा नम्बर १२ का ३८ वर्षीय तथा वडा नम्बर १४ का १५ र २५ वर्षीय पुरुषमा संक्रमण देखिएको नगरपालिकाका स्वास्थ्य संयोजक रामदेब यादवले बताए । यादवका अनुसार उनीहरु भारतको मुम्बई र गुजरातबाट आएका हुन् । भारतबाट जेठको दोस्रो साता आएका उनीहरु आ-आफ्नो वडामा रहेको क्वारेन्टाइनमा बसेका थिए ।
सप्तरीमा कोरोना संक्रमित ९ महिलासहित १ सय २१ पुगेको छ । जसमा एक जना क्वारेन्टाइनका इन्चार्ज एवम् स्वास्थ्य चौकी प्रमुख र कार्यालय सहयोगी पनि छन् । यिनीहरु पनि बोदे बर्साइन नगरपालिका-५ स्थित चन्द्रा माविको क्वारेन्टाइनमा खटिएका थिए ।
आइसोलेसन वेड अभाव भएपछि बिहीबार र बुधबार पुष्टि भएका संक्रमितलाई सम्बन्धित क्वारेन्टाइनमै बस्न भनिएको स्वास्थ्य संयोजक साहहरुले बताए ।यसअघि पुष्टि भएका छिन्नमस्ता गाउँपालिकाका ६ जना पनि क्वारेन्टाइनमै छन्।
प्रतिक्रिया दिनुहोस !
