स्याङजा : भीरकोटस्थित कालिका सामुदायिक अस्पतालको आइसोलेसनमा रहेकी एक महिलाले कोरोना जितेकी छन्। वालिङ नगरपालिका १३ का ३९ वर्षीया ती महिलाले १८ औं दिनमा कोरोना जितेर घर फर्केकी हुन् ।
उनमा जेठ १५ गते कोरोना संक्रमण पोजिटिभ देखिएको हो । जिल्लामा महिला राख्ने आइसोलेसन वार्ड नभएपछि उनलाई पोखरा पठाइएको थियो । एघार दिन पोखरा बसाइपछि उनी कालिकामा स्थापित महिला वार्ड ७ दिनबसेपछि अस्पतालले घर पठाएको हो ।
शनिबार वालिङका ३ जना कोरोनामुक्त भएका हुन् । महिलासँगै ४ जनाले कोरोना जितेपछि वालिङ नगरप्रमुख दिलिपप्रताप खाँण, उपप्रमुख कल्पना तिवारी र स्वास्थ्य शाखा प्रमुख कमलप्रसाद पाण्डेले फुलका गुच्छा, सेनीटाइजर, मास्कलगायतका स्वास्थ्य सामग्री हस्तान्तरण गर्दै विदाइ गरेका थिए ।
यसअघि, स्याङ्जामा थप ६ जना कोरोना जितेर घर फर्किएका छन् । जिल्ला अस्पतालको आइसोलेसनमा रहेका वालिङका ३ जनाले शनिबार कोरोना मुक्त भएका हुन् ।जसमध्ये वालिङ ७ का २० र २९ वर्षीय र वालिङ १३ का २६ वर्षीय पुरुष हुन् ।
नगरप्रमुख खाँणले उनीहरुलाई घरमा सुरक्षित तरिकाले बस्न आग्रह गर्दै केही स्वास्थ्य र दिनचर्या सम्बन्धी गर्नुपर्ने क्रियाकलापका बारेमा समेत सचेत गराए। यसअघि जिल्ला अस्पतालको आइसोलेसनमा रहेका वालिङका १ र गल्याङका २ जना पुरुष कोरोना मुक्त भएर घर फर्किसकेका छन् । अब कालिका सामुदायिक अस्पतालको आइसोलेसनमा ५० जना छन् भने २ जना पोखरामा छन् । कोरोनाबाट एकजनाको मृत्यु भइसकेको छ।जिल्लामा संक्रमितको संख्या ६० पुगेको छ ।
प्रतिक्रिया दिनुहोस !
