उदयपुर : कोरोना भाइरस संक्रमण समुदायस्तरमा फैलन थालेपछि स्थानीय प्रशासनले बिहीबारदेखि जिल्लाका तीन नगरपालिकामा निषेधाज्ञ जारी गरेको छ । राती १२ बजेदेखि लागू हुनेगरी भदौ ७ गतेसम्मका लागि आव्हन गरेको निषेधाज्ञका कारण सदरमुकाम रहेको त्रियुगा, चौदण्डि र बेलका नगरपालिका पूर्णरुपले ठप्प छन् । बिहानैदेखि अत्यावश्यक सवारीसाधन र पसलबाहेक अन्य खुलेका छैनन् ।
दुई दिनअघि प्रहरीले बजार तथा गाउँगाउँमा निषेधाज्ञ समयमा घरबाट बाहिर ननिस्कन भन्दै माइकिङ गरेपछि सर्वसाधरण बाहिर निस्केका छैनन् । तीनवटै नगरपालिकाका सम्पूर्ण क्षेत्रमा लागू हुनेगरी निषेधाज्ञ जारी गरिएको प्रमुख जिल्ला अधिकारी चक्रपाणी पाण्डेले जानकारी दिए ।
निषेधाज्ञ जारी भएका ती पालिकामा समुदायस्तरमै कोरोना संक्रमण फैलिएकाले रोकथाम तथा नियन्त्रणका लागि निषेधाज्ञ जारी गर्नु परेको उनले बताए । प्रशासनको निषेधाज्ञका कारण सदरमुकाम गाईघाट, मोतिगडा, वगाहा, देउरी, जलजले, लालपत्ता, चौदण्डिगढीको बेल्टार, बसाहा, बेलकाको रामपुर, लालवजार, तपेश्वरी लगायतका क्षेत्र पूर्णरुपले ठप्प भएका छन् ।
बिहानदेखि सुनसान बनेका यी क्षेत्रमा नेपाल प्रहरी र सशस्त्र प्रहरीका सुरक्षाकर्मीको बाक्लो उपस्थिति छ । निषेधाज्ञ अवज्ञा गरेमा कारबाही हुने चेतावनी प्रशासनको छ । सर्वसाधारणमा कोरोना सतर्कताप्रति लापरवाही देखिएसँगै कोरोनाको जोखिम बढेको प्रशासनको निष्कर्ष छ ।प्रशासनले नगरवासीलाई अत्यावश्याक कामबाहेक घर बाहिर ननिस्कन र हिडडुल नगर्न अनुरोध गरेको छ ।
निषेधाज्ञलाई कडाई गर्न प्रशासनले हाल सवारी पाससमेत बन्द गरेको छ । मृत्यु, संस्कार र औषधि उपचारबाहेकका सबै कामका लागि पास बन्द गरिएको प्रशासनले जनाएको छ।
खाद्यान्नका लागि हरेक दिन बिहान ९ देखि १२ बजेसम्म खाद्य पसल खोल्न दिने प्रशासनले निर्णय गरेको छ । खाद्यान्न किन्दा पनि सर्वसाधारणले सामाजिक दुरी कायम गर्नुपर्ने, मास्क अनिवार्य लगाउनुपर्ने, सेनिटाइजर प्रयोग गर्नुपर्ने भनिएको छ साथै पसलेले सामाजिक दुरी कायम गराउँदै सामान बिक्री गर्नुपर्ने, सेनिटाइजर वा हातधुने साबुनपानी अनिवार्य राख्नुपर्ने भनिएको छ ।
अनावश्यकरुपले हिँडडुल, भीडभाड गरेको तथा बिनापास सवारी चलाएको पाइएमा तत्काल पक्राउ गरी कारबाही चलाउने जिल्ला प्रहरी प्रमुख एसपी भीमबहादुर दाहालले बताए ।
उदयपुरमा समुदाय तथा सरकारी कार्यालयमासमेत कोरोना संक्रमण देखिएपछि अवस्था जटिल बन्दै गएको छ । हालसम्म उदयपुरमा संक्रमितको संख्या एक सय पाँच पुगेको छ ।
समुदायस्तरमै कोरोना देखिएपछि प्रशासनले रोकथाम तथा नियन्त्रणको यस्तो कदम चालेको हो । निषेधाज्ञकाबीच संक्रमितको परिवार तथा अन्य कन्ट्रयाक ट्रेसिङका आधारमा मानिसको स्वाब परीक्षण गरिने जिल्ला स्वास्थ्य कार्यालयका प्रमुख मोहन सुवेदीले बताए ।
प्रतिक्रिया दिनुहोस !
