पोखरा : पोखराको एक निजी अस्पतालमा मृत्यु भएकी तनहुँकी एकजनामा कोरोना भाइरस संक्रमण पुष्टि भएको छ । तनहुँबाट उपचारका लागि ल्याइएकी ५० वर्षीया महिलाको सोमबार राति मृत्यु भएको हो ।
मंगलबार बिहान उनमा कोरोना पुष्टि भएको थियो । पहिल्यै स्वाब संकलन गरिएकी उनको मृत्यु भइसकेपछि रिपोर्ट पोजिटिभ आएको हो । तनहुँको व्यास नगरपालिकाकी उनी उपचारका लागि ३२ साउनमा पोखरा आएकी थिइन् । आमालाई लिएर आएकी उनकी २५ वर्षीया छोरीमा पनि कोरोना पुष्टि भएको छ । ती महिलाको मृत्युपछि गण्डकीमा कोरोना भाइरस संक्रमितको मृत्यु संख्या ६ पुगेको छ । यसअघि स्याङ्जाका २ र कास्की, गोरखा, बागलुङका १÷१ जनाको मृत्यु भएको थियो ।
पोखरामा पछिल्लो समय कोरोना संक्रमतिको संख्या बढिरहेको छ । १५ जनामा मंगलबार कोरोना पुष्टि भएको हो । यससँगै प्रदेश राजधानी सहर पोखरामा कोरोना भाइरस रोग फैलन नदिन मंगलबार राति १२ बजेदेखि लागु हुने गरी निषेधाज्ञा घोषणा भएको छ ।
यसअघि सोमबार पोखरा महानगरपालिकाकी उपमेयर मञ्जुदेवी गुरुङ संयोजकत्वको संकट व्यवस्थापन समितिले निषेधाज्ञाको सिफारिस जिल्लालाई गरेको थियो । मेयर मानबहादुर जिसीसमेत सहभागी रहेको जिल्ला संकट व्यवस्थापन समितिको बैठकले महानगरपालिकाको उक्त सिफारिस कार्यान्वयन गर्ने निर्णय गरेको हो । ‘हामीले माग गरेअनुसारै निषेधाज्ञा गर्ने निर्णय भएको छ’, मेयर जिसीले अन्नपूर्णसित भने । निश्चित खाले पसलहरुमात्रै निषेधाज्ञामा खोल्ने दिइने जानकारी पनि मेयर जिसीले दिएका छन् ।
सर्वसाधारणलाई समयसमेत दिने गरी मंगलबार रातिदेखि लागु हुने गरी निषेधाज्ञा गर्नेबारे अधिकारीबीच सोमबारै सहमति भएको थियो । ‘सर्वसाधारणलाई पनि समय दिनुप¥यो, फेरि महानगरसँग प्रहरी सेना पनि हुँदैन निषेधाज्ञा कार्यान्वयन गर्न, त्यसैले आफैले घोषणा नगरी जिल्लालाई सिफारिस गरेका थियौं’, उनले भने ।
पोखरामा कोरोना संक्रमित मंगलबार १५ जना थपिएसँगै बिरामीको संख्या २१९ पुगेको छ । आइतबार २२ जनामा कोरोना पुष्टि भएको थियो । अघिल्लो दिन शनिबार १२ जना संक्रमित भेटिएका थिए । पोखरामा संक्रमितमध्ये १ सय १५ जना निको भएका छन् । पोखराकै स्थानीय १ जनाको मात्रै मृत्यु भएको छ । प्रदेशभरचाहिँ कोरोनाबाट मृत्यु भएकाको संख्या ६ छ ।
गण्डकी प्रदेश सरकारले कोभिड रोकथामका लागि बनाएको संकट व्यवस्थापन समितिको पनि सोमबार बैठक बसेको थियो । बैठकले आवश्यकता हेरी आवातजावतमा कडाइ गर्न सक्ने निर्णय गरेको छ । प्रदेशका सबै जिल्लामा बुधबारदेखि हिँड्डुलमा कडाइ गर्ने समितिको निर्णय छ । मुख्यमन्त्री तथा मन्त्रिपरिषद् कार्यालयमा सोमबार अपरान्ह बसेको प्रदेश संकट व्यवस्थापन केन्द्रको बैठकले गण्डकी प्रदेशका सबै जिल्लामा कडाइ गर्ने निर्णय गरेको जारी विज्ञप्तिमा उल्लेख छ ।
प्रतिक्रिया दिनुहोस !
