जाजरकोट : स्थानीय प्रशासनले जाजरकोट सदरमुकाम खलंगामा एक हप्ताका लागि निषेधाज्ञा जारी गरेको छ । सदरमुकाममा कोरोना संक्रमितको संख्या बढ्न थालेपछि जिल्ला प्रशासन कार्यालय जाजरकोटले सोमबार राती १२ बजेदेखि १५ गते १२ बजेसम्मका लागि निशेषाज्ञा जारी गरिएको सहायक प्रमुख जिल्ला अधिकारी विष्णु सहनीले बताए ।
अत्यावश्यक बाहेकका सबै सरकारी कार्यालयको कामकाज समेत बन्द गरिएको छ । केही दिनअघि स्वाब संकलन गरेर पीसीआर परीक्षणका लागि पश्चिम रुकुमको चौरजहारीस्थित मिसन अस्पताल (कोरोना अस्पताल) पठाइएका २० मध्ये १९ जनामा कोरोना संक्रमण भएको पुष्टि भएको थियो ।
भेरी नगरपालिकाले संकलन गरेका १३ मध्य बाहुनथाना स्वास्थ्य चौकीमा कार्यरत एकजना स्वास्थ्यकर्मी, एकजना बैंकका कर्मचारी र दुईजना भेरी नगरपालिकाका कर्मचारी रहेका छन् । त्यस्तै स्वास्थ्य सेवा कार्यालयको एक प्रोजेक्टका दुईजना कर्मचारी, प्रहरी दुईजना, दुईजना नेपाली सेना र अन्य स्थानीयमा कोरोना संक्रमण देखिएको स्वास्थ्य सेवा कार्यालयका महामारी फोकल व्यक्ति कृष्णबहादुर खत्रीले बताए ।
स्थानीय, सुरक्षाकर्मी, बैंकका कर्मचारी, नगरपालिकाका कर्मचारी,स्वास्थ्यकर्मीलगायत सबै क्षेत्रका मानिसमा कोरोना देखिएकाले धेरै मानिसलाई संक्रमण भएको आशंका गरिएको छ । ती मानिससँग प्रत्यक्ष सम्पर्कमा आएकाको कन्ट्रयाक ट्रेसिङ्का आधारमा पीसीआर परीक्षण गर्न पहल भइरहेको भेरी नगरपालिकाका निमित्त प्रमुख प्रशासकीय अधिकृत दलबहादुर घर्तीले बताए ।
कर्मचारीमा कोरोना संक्रमण भएको पुष्टि भएपछि भेरी नगरपालिका र राष्ट्रिय बाणिज्य बैंक सिल गरिएको छ । त्यहाँ कार्यरत सबै कर्मचारीको पीसीआर परीक्षणका लागि स्वाब संकलन गरिएको छ ।
प्रतिक्रिया दिनुहोस !
