पोखरा : कास्की जिल्लाभर १२ भदौ शुक्रबारसम्मलाई लागू गरिएको निषेधाज्ञा नलम्बिने भएको छ । तर कास्की प्रशासनले सवारी साधनमा जोरबिजोर प्रणाली लागू गर्ने भएको छ । २० गतेसम्मका लागि भनेर प्रशासनले शुक्रबार सूचना जारी गरेको छ । जसमा जोरबिजोर प्रणाली लागू गर्ने उल्लेख छ ।
पोखरा महानगरपालिकाको आग्रहमा जिल्ला प्रशासनले भदौ ३ गतेदेखि जिल्लाभर निषेधाज्ञा जारी गरेको थियो । पहिलोपटक ७ गतेसम्मलाई लागु भएको निषेधाज्ञा १२ गतेसम्मलाई थपिएको थियो । निषेधाज्ञा सकिने दिन प्रशासनले अर्को आदेश जारी गरेको हो ।
यात्रुबाहक सार्वजनिक सवारी साधनहरु (बस, माइक्रोबस) सञ्चालन नगर्न प्रशासनले आदेश गरेको छ । ट्याक्सी र निजी गाडी भने जोर गते जोर नम्बरका र बिजोर गते बिजोर नम्बरका मात्रै चलाउन भनेको छ । 'ती साधनहरु बिहान ६:०० बजे देखि साँझ ८: ०० बजेसम्म सञ्चालन गर्न सकिने, 'प्रशासनको आदेशमा भनिएको छ ।
विश्वविद्यालय, क्याम्पस, विद्यालयलगायत सबै प्रकारका शैक्षिक संस्था, तालिम तथा प्रशिक्षण केन्द्रहरु, सिनेमा हल, पार्टी प्यालेस, फनपार्क, रंगाशाला, फुटसल, खेलकुद स्थल, जिमखाना फिटनेस सेन्टर, स्पा, स्विमिङ पुल, ब्युटी पार्लर, सैलुन लगायत सेवा तथा स्थलहरु नखोल्न पनि आदेशमा भनिएको छ ।
सरकारी तथा गैरसरकारी कार्यालयहरु एवं बैंक तथा वित्तीय संस्था तथा सहकारीहरु सञ्चालन गर्न सकिने सूचनामा उल्लेख छ । तर सामाजिक दुरी कायम गरी भिडभाड नहुने गरी सञ्चालन गर्नुपर्ने भनिएको छ । ‘कामदार तथा सेवाप्रवाहलाई सुरक्षित बनाई सबै प्रकारका निर्माण कार्य तथा उद्योगहरु सञ्चालन गर्न सकिने,’ आदेशमा भनिएको छ ।
होटल तथा रेस्टुरेन्टहरु सञ्चालनको हकमा टेक अवे सेवा मात्र साँझ ७ः०० बजेसम्म सञ्चालन गर्न सकिने भएको छ । प्रशासनले अत्यावश्यक कामका लागि घर बाहिर निस्कँदा अनिवार्य रुपमा मास्कको प्रयोग गर्न, दुई मिटरको भौतिक दुरी कायम गर्न, पटकपटक साबुन पानीले हात धुन तथा स्यानिटाइजरको प्रयोग गर्न पनि भनेको छ । 'उल्लेखित प्रावधानहरुको अवज्ञा गरी सेवा तथा कार्य सञ्चालन गरे गराइएको पाइए कारबाही हुने व्यहोरा समेत सूचित गरिन्छ,' आदेशमा भनिएको छ । 
प्रतिक्रिया दिनुहोस !
