सर्वत्र विरोध पछि मेची अस्पतालको नयाँ भवनमा सारियो कोरोना अस्पताल
भदौ १५, २०७७ सोमबार १३:१०:०
झापा : मेची प्रादेशिक अस्पतालको नयाँ भवनमा कोभिड १९ का संक्रमितको अलग्गै उपचार सुरु हुने भएको छ ।अस्पतालले एउटै भवनमा संक्रमित र अन्य बिरामी राखेर उपचार गर्दै आएको विषयमा स्थानीयको चर्को विरोध आएपछि अस्पतालको नवनिर्मित भवनमा आइसोलेसन सेन्टर बनाइएको हो ।
कोभिड संक्रमित राख्ने र ओहोरदोहोर गराउने ठाउँ एउटै भएको भन्दै स्थानीयले बाटबारम्बार गुनासो आइराखेपछि अस्पतालले कोभिड संक्रमितको उपचार अलग्गै भवनमा गराउन सुरु गरेको हो । मेची अस्पतालका सूचना अधिकारी मनोज पोख्रेलका अनुसार सोमबार प्रदेश राज्यमन्त्री जसमायाग जमेरको अनुगमन र अवलोकनपछि मात्र बिरामी उक्त भवनमा सारेर उपचार सुरु गरिने छ ।
पोख्रेलका अनुसार नयाँ भवनमा बिरामी राख्ने सबै तयारी पूरा भइसकेको छ । नेपाली सेनाले उपचार केन्द्रको सुरक्षा तथा व्यवस्थित पार्ने जिम्मेवारी लिएको उनले बताए । संक्रमितको उपचारका लागि अस्पतालका फिजिसियन डा. गोविन्द कँडेलको संयोजकत्वमा ८ सदस्य समिति गठन भएको छ । समितिमा आवद्ध चिकित्सकको टोलीले नै संक्रमित बिरामीको उपचार गर्ने छन् ।
अस्पतालको योजना ७५ बेडको उपचार केन्द्र बनाउे भएपनि अहिले तत्कालका लागि ५० बेड तयार भइसकेको छ । बाँकी पनि छिटै तयार हुने मेची अस्पतालका मेडिकल सुपरिटेन्डेन्ट डा. पिताम्बर ठाकुरले बताए । अस्पतालकै पुरानो भवनमा बनाइएको आइसोलेसन वार्डमा गत साउन १९ गतेदेखि कोरोना संक्रमण पुष्टि भएका बिरामी राखेर उपचार सुरु गरिएको थियो । त्यसपछि नै अस्पतालमा अन्य उपचारका लागि जाने बिरामीको संख्या ह्वातै घटेर अस्पतालमा अन्य रोगका बिरामी आउने संख्या करिब शुन्य नै थियो ।
जिल्लाको एक मात्र सरकारी अस्पतालमा कोरोना संक्रमित बिरामी राखिएपछि संक्रमण फैलिन सक्ने त्रासकै कारण गरिब तथा असहाय बिरामी जान छाडेपछि चौतर्फी आलोचना सुरु भएको थियो । कोभिड अस्पताल अन्यत्र सार्ने विषयमा नेपाली कांग्रेस जिल्लाले जिल्ला प्रशासन कार्यालयमा ज्ञापनपत्र बुझाउँदै कोभिड-१९ उपचार केन्द्र अन्यत्र सार्न माग राख्दै व्यापक विरोध आएको थियो।
एउटै भवनमा कोभिड र अन्य बिरामी राख्दा सर्वसाधारण बिरामी अस्पताल आउन डराएको भन्दै विभिन्नपक्षबाट पनि निरन्तर दबाब आएपछि नयाँ भवन रातारात तयार पारिएको हो । हालको नयाँ भवन पुरानो अस्पतालको भवनबाट सय मिटरको दूरीमा छ ।
हाल अस्पतालको पुरानो भवनमा रहेको आइसोलेसन भने नहटाइने भएको छ । अलिक बढी लक्षण देखिएका बिरामीलाई पुरानै आइसोलेसन कक्षमा राखेर नै उपचार गरिने भएको छ ।
प्रतिक्रिया दिनुहोस !
