राजविराज : सीडीओको भान्से समेत रहेका जिल्ला प्रशासन कार्यालय सप्तरीका कार्यालय सहयोगी ६८ वर्षीय पुरुषको बिहीबार मृत्यु भएको छ । कोरोनाबाट संक्रमित भइ होम आइसोलेसनमा बसेका उनको बिहीबार मृत्यु भएको परिवारका सदस्यले जानकारी दिएका छन् । जिल्ला प्रशासन कार्यालयबाट ५८ वर्षको उमेरमा अवकाश पाएपछि पनि उनी करारमा प्रमुख जिल्ला अधिकारीको निवासमा निरन्तर भान्से थिए ।
गत भदौ २८ प्रजिअ शंकरहरी आचार्यसहित कार्यालयका कर्मचारीहरुको पीसीआर परीक्षण गरिएकोमा भान्सेसहित जिल्ला प्रशासन कार्यालयका थप दुई कार्यालय सहायक र एक प्रहरीमा संक्रमण देखिएको थियो ।
संक्रमण पुष्टि भएपनि स्वास्थ्य अवस्था सामान्य रहेकाले उनी होम आइसोलेसनमा बसेका थिए । बिहीबार बिहान ६ बजे उठेर चिया पिएका उनले ज्याउलो खाएर सुत्न गएपछि नउठेको उनका परिवारका सदस्यले जानकारी दिएका छन् ।
मृतकको दाहसंस्कार गर्न शवलाई सप्तकोशी नदी लगिएको छ ।योसँगै सप्तरीमा मृत्यु हुने कोरोना संक्रमितको सङ्ख्या १२ जना पुगेको स्वास्थ्य कार्यालय सप्तरीले जनाएको छ । जसमा २ जना महिला छन् ।
प्रतिक्रिया दिनुहोस !
