राजविराज : कोरोनाबाट संक्रमित सप्तरीको तिलाठी कोइलाडी गाउँपालिका–५ का ६८ वर्षीय पुरुषको उपचारका क्रममा शुक्रबार मृत्यु भएको छ ।
स्वास्थ्य कार्यालय सप्तरीका निमित्त कार्यालय प्रमुख दुनियालाल यादवका अनुसार उपचारका क्रममा उनको न्यूरो अस्पताल विराटनगरमा मृत्यु भएको हो । निमोनियाबाट ग्रसित भएपछि ६ दिनअघि न्युरो अस्पताल भर्ना भएका पुरुषको मृत्यु भएपछि शव ल्याउने तयारी भइरहेको गाउँपालिका अध्यक्ष सतिश सिंहले बताए । सिंहले कोशी नदीमा शवको अन्त्यष्टि गर्ने तयारी भइरहेको जानकारी दिए ।
सप्तरीमा तीन दिनको अवधिमा चार जनाको मृत्यु हुँदा मृत्यु हुनेको सङ्ख्या १८ पुगेको छ । जसमा २ जना महिला छन् । यसअघि विराटनगरको नोबेल शिक्षण अस्पतालमा उपचारार्थ कोभिड १९ संक्रमित विष्णुपुर गाउँपालिका–५ का ६७ वर्षीय पुरुषको बिहीबार मृत्यु भएको थियो ।
ज्वरो, खोकी र श्वासप्रश्वासमा समस्या भएपछि उपचारका लागि नोबेलको आकस्मिक कक्षको आइसीयूमा उपचार थालिएको उनमा मधुमेह, उच्च रक्तचाप र मिर्गौलाको समस्या रहेको अस्पतालका जनसम्पर्क अधिकृत नारायण दाहालले जानकारी दिए ।
भक्तपुर अस्पतालमा उपचाररत सप्तरीका ४८ वर्षीय पुरुषको बिहीबार नै कोरोना संक्रमणबाट मृत्यु भयो । खोकी र श्वासप्रश्वासमा समस्या देखिएपछि असोज १२ गते अस्पताल भर्ना भएका पुरुषमा निमोनिया र मधुमेहको समेत समस्या देखिएको अस्पतालका सूचना अधिकारी डा. सुनिल ढुंगेलले जानकारी दिए ।
कोरोनाबाट संक्रमित अग्नीसाइर कृष्णसवरण गाउँपालिका–४ बनौलीका ३५ वर्षीय पुरुषको धरानस्थित वीपी कोइराला स्वास्थ्य विज्ञान प्रतिष्ठानमा उपचारका क्रममा बुधबार मृत्यु भयो । बाल्यकालदेखि नै सुगरबाट पीडित उनको दुवै मिर्गौलाले काम गर्न छाडेको परिवारका सदस्यले जानकारी दिए । धरानस्थित प्रयोगशालामा गरिएको परीक्षणमा असोज ८ गते उनमा कोरोना संक्रमण पुष्टि भएको थियो ।
प्रतिक्रिया दिनुहोस !
