जाजरकोट : जुनीचाँदेमा जिप दुर्घटनामा मृत्यु भएका वडाध्यक्षसहित सात जनाको शव आफन्तले बुझ्न मानेका छैनन् । चालकको लापरबाही र मापदण्डविपरीतको सडकमा दुर्घटना भएको भन्दै आफन्त र स्थानीय आन्दोलनमा उत्रिएका छन् ।
आक्रोशित स्थानीयले बिहीबार जिप चालक गोरख बस्नेतको जुनीचाँदे–५ मटेलास्थित घर र छेडागाड–६ सुवानाउलीस्थित पसलमा आगजनी गरेका छन् । प्रहरीले पीडित पक्षसँग शव बुझ्न गरेको आग्रह र वार्ता असफल भएको छ । मृतकका आफन्तले प्रमुख जिल्ला अधिकारी, जिल्ला प्रहरी प्रमुख र जनप्रतिनिधिको रोहबरमा मात्र वार्तामा बस्ने अडान लिएका छन् ।
जाजरकोट सदरमुकाम खलंगाबाट जुनीचाँदेतर्फ गइरहेको भे. १ ज ९३५ नम्बरको जिप बुधबार दिउँसो जुनीचाँदे गाउँपालिका–१ स्थित औलभीरमा दुर्घटना भएको थियो । दुर्घटनामा जुनीचाँदे–११ का वडाध्यक्ष अमरबहादुर शाहीसहित सात जनाको मृत्यु भएको छ । गम्भीर घाइते भएका नरबहादुर बुढाको सुर्खेतमा उपचार भइरहेको छ ।
औलभीरबाट खसेको जिप सडकबाट करिब दुई सय मिटर तल मजकोट खोलामा परेको थियो । घटनालगत्तै गाडी चालक गोरख बस्नेत फरार छन् । उनको मोबाइल भने गाडीमै फेला परेको छ । घटनास्थल सदरमुकाम खलंगादेखि २० कोस पश्चिममा पर्छ । घटनालगत्तै आक्रोशित स्थानीयले प्रहरी र जनप्रतिनिधि लक्षित ढुंगामुढा र नाराबाजी गरेका छन् ।
बडाबन र पञ्चाला इलाका प्रहरी कार्यालयबाट खटिएको प्रहरी टोलीले स्थानीयलाई नियन्त्रण गर्न नसकेपछि सदरमुकाम खलंगाबाट सशस्त्र प्रहरी र नेपाल प्रहरीको थप फोर्स पठाइएको थियो । सडकको ग्रेड नमिलेको, थोत्रा गाडी सञ्चालन गर्न दिइएको र चालकको लापरवाहीले दुर्घटना भएको स्थानीयको आरोप छ ।
आक्रोशित स्थानीयले जुनीचाँदे गाउँपालिकाकी कार्यवाहक अध्यक्ष शिवा आचार्यलगायतका जनप्रतिनिधिलाई ढुंगामुढा गरेपछि सशस्त्र र नेपाल प्रहरी घटनास्थलमा खटिएको छ ।
प्रतिक्रिया दिनुहोस !
