उदयपुर : उदयपुरको सदरमुकाम नजिकको बस्तीमा आइबार राती हात्तीको समूहले स्थानीयको घरमा क्षति पुर्याएपछि रातभर जाग्राम बसेका छन् । सदरमुकाम गाईघाटबाट ६ किलोमिटर पश्चिम त्रियुगा नगरपालिका ५ पिपलचौरमा पाँचवटा जंगली हात्तीले चार घरमा क्षति पुर्याएपछि स्थानीय रातभर जाग्राम बसेका हुन् ।
राती १० बजेतिर दक्षिणी भेगबाट आएका हात्तीको समूहले स्थानीय सिताराम भुजेल, गौरीशंकर भुजेल, कविर थापामगर र हिरालाल मगरको घरमा क्षति पुर्याएको जिल्ला प्रहरी कार्यालयका डिएसपी बेदप्रसाद गौतमले जानकारी दिए ।
परिवारका सबै सदस्य सुतिसकेको अवस्थामा जंगलबाट निस्किएका हात्तीले उनीहरुको घरको गाह्रो, वरण्डा, वारवेरा भत्काइ दिएको उनले बताए । डिएसपी थापाका अनुसार हात्तीले स्थानीयको दुई लाख बढीको क्षति पुर्याएको छ।
राती गाउँ पसेपछि स्थानीयले रातभर आगो बालेर हात्ती लखेटेका थिए । हात्ती गाउँ छोडेर गएपनि फर्केर थप क्षति पुर्याउने डरले रातभर जाग्राम बस्नु परेको स्थानीय युवराज कार्कीले बताए ।
धान पाक्ने सिजनमा जंगली हात्ती बर्षेनि निस्कने गरेका छन् । समूहगत रुपमा गाउँ प्रवेश गर्ने हात्तीले बर्षेनि सर्वसाधरणको ज्यान लिने, अन्नवाली र घरमा क्षति पुर्याउने गरेको उनले बताए ।त्यस्तै बेलका नगरपालिका क्षेत्रभित्र कोसी टप्पु वन्यजन्तु आरक्षण क्षेत्रबाट निस्कने हात्तीले बर्षेनि क्षति पुर्याउँदै आएको छ । हात्ती नियन्त्रणका लागि नगरपालिकाले तारघेरा गरेपनि रोक्न नसकेपछि स्थानीयले नियन्त्रणका लागि नगरपालिका, स्थानीय प्रशासन, डिभिजन वन कार्यालय कोषिटप्पु वन्यजन्तु आरक्षण क्षेत्र र सुरक्षार्थ खटिएका नेपाली सेनासँग आग्रह गरेका छन् ।
स्थानी विचारी साकीले भने, 'दिनभर आउँदैनन्, जब राती हुन्छ, हुल बाँधेर धानवालीमा प्रवेश गर्छन्, 'राती हात्ती आउने भएपछि मानवीय, भौतिक र अन्नवालीमा क्षति हुन नदिन स्थानीय रातभर जाग्राम बस्दै आएका छन्,' उनले भने, 'घरबाट त जसोतसो लखेटछौं, धानवालीमा सकिन्न।'
तर्साउनका लागि आगोको राको, घण्टीको प्रयोग गरेपनि अटेर गर्ने गरेको उनले बताए । बेलका नगरपालिकाका प्रमुख दुर्गाकुमार थापाले वन्यजन्तु प्रवेश गर्ने मार्गमा विद्युतीय घेरावेरा गरेपनि फरक बाटोबाट आउने गरेका कारण नियन्त्रणमा कठिनाइ भएको बताए ।
प्रतिक्रिया दिनुहोस !
