उदयपुरमा मेयरसहित ४ जनामा कोरोना पुष्टि, १५ गतेसम्म नगरपालिका बन्द
कात्तिक ४, २०७७ मंगलबार १३:४७:०
उदयपुर : उदयपुरको कटारी नगरपालिकाका मेयरसहित थप चारजनामा कोरोना संक्रमण पुष्टि भएको छ । धरानस्थित बीपी कोइराला स्वास्थ्य विज्ञान प्रतिष्ठानको कोरोना प्रयोगशालामा गरिएको परीक्षणबाट कटारी नगरपालिकाका मेयर ज्ञानेन्द्र श्रेष्ठ, प्रमुख प्रशासकिय अधिकृत गणेशप्रसाद अर्याल, शिक्षा शाखाका श्रोत व्यक्ति सुर्य कार्की र इलाका प्रशासन कार्यालय कटारीका प्रमुख चन्द्र सिवाकोटीमा कोरोना पोजेटिभ देखिएको हो ।
यो सँगै जिल्लामा संक्रमितको संख्या संख्या २ सय ४ पुगेको छ । त्यसमध्ये ६५ जना महिला र एक सय ३५ जना पुरुष रहेको जिल्ला स्वास्थ्य कार्यालयका प्रमुख मोहन सुबेदीले जानकारी दिए । जिल्लामा हालसम्म आठ हजार एक सय २२ जनाको स्वाव संकलन गरिएको छ त्यसमध्ये आठ हजार ८७ जनाको रिर्पोट आईसकेको प्रमुख सुबेदीले बताए ।
मेयर श्रेष्ठले जनताको काम गर्दा गर्दै आफूमा कोरोना संक्रमण भएको बताएका छन् । नागरिकको हरेक गुनासाहरु सुन्ने क्रममा नगरका गाउँ, टोल बजारदेखि प्रदेश र केन्द्रसम्म पुग्दा कतिबेला को बाट संक्रमण पुष्टि भयो भन्ने हेक्का नै नराखेको बताए।
नगरको सिमित बजेटले मात्रै नगरको विकास सम्भव नभएपछि विभिन्न योजना लिएर केन्द्र र प्रदेश धाउँदा आफूलाई कोरोना सल्केको हुन सक्ने अनुमान गरे । लक्षण वेगरको संक्रमण देखिएकाले त्यति धेरै असहज नभएको उनले बताए । त्रियुगा नगरपालिका ३ भुल्केबाट उदयपुरमा सुरु भएको कोरोना भाइरस भुल्केपछि सबैभन्दा बढी बेलका नगर क्षेत्रमा संक्रमित देखिएका छन् ।
संक्रमित मध्ये हालसम्म त्रियुगा नगरपालिकामा ९२ जना, बेलका नगरपालिकामा ५७ जना, कटारी नगरपालिकामा ३३ जना, चौदण्डीगढी नगरपालिकामा ११ जना, ताप्ली गाउँपालिकामा ३, उदयपुरगढी र रौतामाई गाउँपालिकामा २÷२ जना रहेका छन् ।
१५ गतेसम्म नगरपालिका बन्द
मेयर, प्रमुख प्रशासकिय अधिकृत र शिक्षा शाखा प्रमुखलाई कोरोना भाईरस पुष्टि भएसँगै कटारी नगरपालिकाका अत्यावश्यक सेवा वाहेक सबै कामहरु ठप्प भएका छन् । उपप्रमुख भिमकुमारी राउतले मंगलबार एक प्रेस विज्ञप्ति जारी गर्दै कात्तिक ४ गतेदेखि कार्यालय र मातहतका कार्यालयका शाखाहरुबाट सम्पादन गरिने अत्यावश्यक सेवा (दमकल, फोहोरमैलाको गाडी, नगर प्रहरी, स्वास्थ्य सेवा) वाहेक दैनिक सञ्चालन हुने सेवाहरु कात्तिक १५ गतेसम्म बन्द हुने जनाइएको छ ।
संक्रमण थप फैलन सक्ने खतरा रहेकाले नियन्त्रणका लागि कार्यालयका कामकाज बन्द गर्नु परेको उनले बताएकी छिन् । विज्ञप्तिमा पोजेटिभ देखिएका व्यक्तिहरुसँग सम्र्पकमा रहेका सबैलाई होम क्वारेन्टाइनमा बसिदिन र स्वास्थ्य सम्बन्धि समस्या देखिएमा नजिकको स्वास्थ्यचौकीमा सम्र्पक गरी सुरक्षित रहन अनुरोध गरिएको छ ।
प्रतिक्रिया दिनुहोस !
