उदयपुर : उदयपुरका जनप्रतिनिधि धमाधम कोरोना भाइरसमुक्त भएसँगै आफ्नो काममा फर्किएका छन् । सोमबार कटारी नगरपालिकाका मेयर ज्ञानेन्द्र श्रेष्ठ कोरोना मुक्त भएसँगै नगरपालिकाको काममा फर्किएका हुन् ।
यसअघि जिल्ला समन्वय समितिकाका प्रमुख खड्गबहादुर दर्नाल, बेलका नगरपालिकाका मेयर दुर्गाकुमार थापा, वडाध्यक्ष दिनेश्वर चौधरी र एक सदस्य कोरोना भाइरस जितेर पुर्ववत अवस्थामा फर्किसकेको जिल्ला स्वास्थ्य कार्यालय प्रमुख मोहन सुबेदीले जानकारी दिए ।
आफ्नो भूमिका निर्वाह गर्नेक्रममा एक महिना यता कोरोना भाइरसबाट संक्रमित भएपछि उनीहरु कोभिड अस्पतालमा भर्ना भइ उपचाररत थिए । १४ दिनपछि कोरोना मुक्त भएका कटारीका मेयर श्रेष्ठले जनताको काम गर्दा गर्दै आफू संक्रमित भएको बताए ।
उनले स्वास्थ्य सतर्कता नै सबैभन्दा उपयुक्त भएकाले स्वास्थ्य मापदण्ड अपनाउँदै पुनः जनताको सेवामा फर्किएको प्रतिकृया दिए । मेयर, प्रमुख प्रशासकिय अधिकृत, शिक्षा शाखाका कर्मचारीमा कोरोना देखिएपछि १५ दिनका लागि नगरपालिकाका अत्यावश्यक वाहेक सबै सेवा बन्द थिए ।
१५ दिन देखि प्रभावित भएका सबै सेवालाई निरन्तरता दिँदै विकास निर्माणका कामलाई अघि बढाईने उनले बताए । उनीसँगै संक्रमित भएका इलाका प्रशासन कार्यालयका प्रमुख चन्द्र सिवाकोटी पनि कोरोना मुक्त भएका छन् । तर सँगै संक्रमित रहेका नगरपालिकाका प्रमुख प्रशासकीय अधिकृत गणेशप्रसाद अर्याल र शिक्षा शाखाका श्रोत व्यक्ति सूर्य कार्कीमा भने पुनः पोजिटिभ आएपछि आइसोलेसनमै रहेको मेयर श्रेष्ठले बताए ।
यसअघि कोरोना जितेर फर्किएका जिसस प्रमुख र बेलकाका मेयर थापा आफू नियमित काममा फर्कि जनताको सेवामा रहेको बताएका छन् । हालसम्म ७३ जना महिलासहित दुई सय ३५ जनामा कोरोना संक्रमण देखिएको छ । संक्रमितमध्ये २१ महिलासहित ५९ जना आइसोलेसनमा बसी उपचार गराई रहेको स्वास्थ्य प्रमुख सुबेदीले बताए ।
प्रतिक्रिया दिनुहोस !
