उदयपुर : कोरोना भाइरसको संक्रमण देखिएपछि काठमाण्डौँस्थित आफन्तको होमआइसोलेसनमामा बसेका उदयपुरको कटारी नगरपालिकाका मेयर ज्ञानेन्द्र श्रेष्ठ मंगलबार हेलिकोप्टरबाट गृह नगर फर्किएका छन् ।
यातायातका साधनमा असुरक्षित महशुस गरेपछि मेयर श्रेष्ठसहित ५ जना हेलिकोप्टरबाट कार्यक्षेत्र फर्किएका हुन् । उनीहरु बिहान १० बजे कटारीस्थित टाइगर फिल्डमा झरेका हुन् । मेयर श्रेष्ठसँग इलाका प्रशासन कार्यालय कटारीका प्रमुख चन्द्र सिवाकोटी, निर्माण व्यावसायी हरेराम घिमिरे, नगरपालिकाका चालक प्रेम शाही र मेयरकी भतिजी स्वेता श्रेष्ठ आएका हुन् । पछिल्लो पटकको परीक्षणमा नेगेटिभ रिपोर्ट आएसँगै मेयर कोरोनामुक्त भएको कटारी नगरपालिका स्वास्थ्य शाखाले जनाएको छ ।
केहि दिन काठमाडौंमै आराम गर्ने योजना बनाएका मेयर श्रेष्ठले आफ्नो अनुपस्थितिमा जनताका काम र विकास निर्माणका कामहरु थुप्रै रोकिएकाले चाँडै फर्किएको बताए । असोज ४ गते मेयरसहित प्रमुख प्रशासकीय अधिकृत, ईलाका प्रसाशन कार्यालयका प्रमुख, कटारी नगरको शिक्षास्रोत व्यक्ति गरी ४ जनामा कोरोना संक्रमण पुष्टि भएको थियो । कोरोना पुष्टि भएपछि होम आइसोलेसनमा बसेका मेयरको १४ औं दिनमा रिपोर्ट नेगेटिभ आएको हो ।
हेलिकप्टरबाट झर्नसाथ मेयर श्रेष्ठ सिधै कटारी नगरपालिकाले ताराघारीमा निर्माणाधिन ३० बेडको आइसोलेसनमा रहेका आफ्ना नगरबासी र शुभचिन्तकलाई फलफुल लिएर भेटन र अवश्था बुझ्न पुगेका थिए । त्यसक्रममा उनले कोरोनाको औषधिउपचार केहि नभएपनि आत्मवल र स्वास्थ्य मापदण्ड पुरा गर्न सके सहजै जित्न सक्ने बताए । नेपाल प्रहरी, नगर प्रहरी र स्थानीय समेत गरेर ११ जना संक्रमित ताराघारीमा बस्दै आएका छन् ।
संक्रमितसँग छुटेसँगै उनी नगरपालिका पुगेका थिए । त्यहाँ मेयर लगायतको टिमलाई जनप्रतिनिधि र कर्मचारीले फुलमाला लगाएर स्वागत गरेका थिए । त्यसक्रममा उनले कोरोनालाई ख्याल ठट्टा नगर्न र स्वास्थ्य मापदण्ड पुरा गर्न आग्रह गरे । मेयर श्रेष्ठले बुधबारदेखि स्वास्थ्य मापदण्डको ख्याल गरी नियमित काममा फर्कनेसमेत बताए ।
प्रतिक्रिया दिनुहोस !
