मुस्ताङको छोसेरमा आगलागीबाट एक घर नष्ट, प्रहरी भोलिपल्ट मात्रै पुग्यो

जोमसोम : हिमाली जिल्ला मुस्ताङको लोमान्थाङ गाउँपालिका—१ छोसेरको सिंजास्थित एक घरमा सोमबार साँझ आगलागी हुँदा घर जलेर ध्वस्त भएको छ ।

स्थानीय लाक्पा ढिन्डुक गुरुङको एकतले ५ कोठे ढुङ्गा र माटोले बनेको घरमा आगालागी हुँदा लाखौँ रकम बराबरको क्षति भएको बताइएको छ । क्षतिको पूर्ण विवरण भने आइसकेको छैन ।मंसिर  १ गते भाइटीकाको दिनमा मुस्ताङको उत्तरी क्षेत्रमा भारी हिमपात भएको थियो । हिमपातसँगै अत्याधिक चिसो बढेकाले स्थानीय लाक्पा ढिन्डुक गुरुङको घरमा घरमै गुईठा बालेर आगो तापेर बस्ने क्रममा साँझ ७ बजे भीषण आगलागी भएको दिव्यदीप माविका शिक्षक गोबिन्दप्रसाद श्रेष्ठले जानकारी दिए ।

आगलागीबाट गुरुङको घरमा रहेको फर्निचरका सामान, वायरिङ गरिएको सोलार उपकरण, लत्ता कपडा र घरमा हिउँदयामका लागि जाडो छल्न जोहो गरिएको गुईठा जलेर नष्ट भएको शिक्षक श्रेष्ठले बताए । आगलागीबाट पशुचौपाया तथा मानवीय जोखिम नभए पनि ५ कोठे घर जलेर ध्वस्त भएको छ ।

आगलागी भएपछि दिव्यदीप माविका शिक्षकहरुसहित स्थानीयको करिव २२ जनाको समूहले ४ घण्टापछि आगो नियन्त्रणमा लिएको थियो । तर शिक्षक तथा स्थानीयबासीले आगो नियन्त्रणमा लिएको भए पनि मोवाइल नेटवर्कको समस्याले प्रहरी उपस्थित हुन सकेन । घटनाको भोलिपल्ट मात्र प्रहरी घ६नास्थलमा पुगेर क्षति विवरण संकलन गरेको छ ।