जाजरकोट : कर्णाली प्रदेशसभा सदस्य कौशिलावती खत्रीलाई कोरोना संक्रमण भएको छ । केही दिनअघि रुघाखोकी र ज्वरोले थलिएकी खत्रीको कोरोना पीसीआर परीक्षण गर्दा कोरोना पोजिटिभ देखिएको हो । उनीसहित घरका ८ जनालाई कोरोना संक्रमण देखिएको छ।
खत्रीका श्रीमान गैरसरकारी संस्था महासंघ कर्णाली प्रदेशका अध्यक्ष खिमबहादुर शाही, उनका छोरी ज्वाँइ, नातीनातिनालगायतलाई कोरोना संक्रमण भएको छ । सामाजिक सञ्जालमा खत्रीले आफ्नो परिवारका सबै सदस्यलाई कोरोना संक्रमण देखिएकोले आफूसँग सम्पर्कमा आएका सबैलाई सजग हुन आग्रह गरेकी छन् ।
उनले आफूहरु जाजरकोट सदरमुकामस्थित घरमा होम आइसोलेसनमा रहेको समेत जानकारी गराएकी छन् । जाजरकोटमा कोरोना संक्रमण बढ्दै गएपनि परीक्षण नगर्दा भित्रभित्रै भुसको आगो झै कोरोना संक्रमण फैलिएको हुन सक्ने स्थानीय शोजन शाक्यले बताए ।
प्रतिक्रिया दिनुहोस !
