रुकुम: विवाद मिलाउन प्रहरी चौकीमा जुटेका वडाध्यक्षहरुबीच कुटपिट, प्रहरीद्वारा हवाइ फायर

जाजरकोट: रुकुम पश्चिममा नेकपा (दाहाल–नेपाल समूह) र कांग्रेसका कार्यकर्ताबीचको विवाद समाधान गर्न प्रहरी कार्यालयमा भइरहेको छलफलका क्रममा वडाध्यक्षहरुबीच कुटपिट भएको छ ।

रुकुम पश्चिमको आठबीसकोट नगरपालिका ३, ८ र ९ का वडाध्यक्ष फरक–फरक पार्टीका कार्यकर्ताबाट कुटिएको बताइएको छ । स्थिति नियन्त्रणमा लिन प्रहरीले २५ राउण्ड हवाइ फायर समेत गर्नुपरेको थियो ।

आठबीसकोट नगरपालिकामा नेकपा र कांग्रेसका कार्यकर्ताबीच भएको विवाद मिलाउन इलाका प्रहरी कर्यालयमा भइरहेको छलफलका क्रममा वडा नम्बर ९ का वडाध्यक्ष तारकबहादुर शाहीमाथि कुटपिट भएको हो । उनलाई वडा नम्बर ३ का अध्यक्ष केशरमान विक र वडा नम्बर ८ का अध्यक्ष मानबहादुर चनाराले प्रहरीकै अगाडि कुटेको छलफलमा सहभागी नेपाली कांग्रेसका नगर सभापति कमल शाहले बताए ।

शाही नेपाली कांग्रेस, केशरमान र मानबहादुर नेकपा निकट हुन् । वडाध्यक्ष शाहीमाथि आक्रमण भएपछि आक्रोशित नेपाली कांग्रेसका कार्यकर्ताले वडाध्यक्षद्वय केशरमान र मानबहादुरलाई समेत आक्रमण गरेका छन् ।

प्रहरी कार्यालयमै दुई राजनीतिक दलका कार्यकर्ताबीच झडप भएपछि प्रहरीले २५ राउण्ड हवाई फायर गर्नुपरेको जिल्ला प्रहरी कार्यालयका प्रमुख तथा प्रहरी नायब उपरीक्षक ध्रुवकुमार श्रेष्ठले बताए ।

जिल्लाबाट प्रहरी निरीक्षक कपिल शाहीको नेतृत्वमा थप प्रहरी पठाएपछि स्थित नियन्त्रणमा आएको उनले बताए । प्रहरीले वडाध्यक्षद्वय केशरमान र मानबहादुरलाई नियन्त्रणमा लिएको छ । आठबीसकोटमा खानेपानी, बस काउण्टर लगायत विषयमा नेकपा र कांग्रेस कार्यकर्ताबीच पटक–पटक विवाद र झडप हुँदै आइरहेको छ ।