राजविराज : सप्तरीको कञ्चनरूप नगरपालिका–११ ठेलियाको नहरस्थित भित्री सडक खण्डमा प्रदेश–०२–०१–००१ त ००३२ नम्बरको ट्याक्टर दुर्घटना हुँदा सोही ठाउँका १८ वर्षीय रामअशिष रामको मृत्यु भएको प्रहरीले जनाएको छ । चालकसहित चार जना घाइते भएका छन् ।
घटनास्थलमा नै मृत्यु भएका मृतकको शव पोष्टमार्टमका लागि बिहीबार साँझ नै राजविराजस्थित गजेन्द्रनारायण सिंह अस्पतालको शव गृहमा ल्याइएको छ । प्रत्यक्षदर्शीहरुका अनुसार ट्याक्टरका चालक भर्खर ड्राइभिङ सिक्दै गरेका सिकारु चालक थिए ।
ट्याक्टर आफैँ अनियन्त्रत भइ पल्टिएको र चालक १७ वर्षीय विशाल राम, ट्याक्टरमा सवार १६ वर्षीय कृष्ण साह, १७ वर्षीय सुनिलकुमार राम र अग्निसाई र कृष्णसवरण गाउँपालिका–२ मटिगढाका २१ वर्षीय मदन साह घाइते भएको डिएसपी भुवनेश्वरप्रसाद साहले बताए ।
घाइतेहरुको खुट्टा, पेट, टाउको र शरिरका विभिन्न भागमा चोट लागेको बताइएको छ । घाइतेमध्ये कृष्णको अवस्था गम्भीर रहेको छ । घाइतेहरुलाई उपचारका लागि सप्तरीको रूपनीस्थित युनिक अस्पतालमा भर्ना गरिएको छ ।
प्रतिक्रिया दिनुहोस !
