सिन्धुली : सिन्धुलीमा सालको अवैध काठ चोरी निकासी गर्ने चार जना लाई ट्याक्टर सहित पक्राउ परेका छन् ।
शुक्रबार पक्राउ पर्नेमा तीनपाटन गाउँपालिका २ सिन्धुलीका ४८ वर्षीय कर्णबहादुर तामाङ, सोही ठाउँका १८ वर्षीय भुवन मगर, ३५ वर्षीय बलबहादुर राना र ५० वर्षीय मानबहादुर मगर छन् । उनीहरुमध्ये तामाङ ट्याक्टर चालक समेत भएको जिल्ला प्रहरी कार्यालय सिन्धुलीका प्रवक्ता तथा प्रहरी नायव उपरीक्षक श्यामकुमार खत्रीले जानकारी दिए ।
‘उनीहरुलाई तीनपाटन गाउँपालिका १ बाट सालको काठ अवैध चोरी निकासी गरी कमलामाई नगरपालिका १० सरकारी टोलतर्फ ट्याक्टरमा राखी ल्याउँदै गर्दा ना ३ त ८०० नम्बरको ट्याक्टर र काठ सहित प्रहरीले नियन्त्रणमा लिएको हो,’ खत्रीले भने ।
उनीहरुलाई सालको कडी २३ दशमलव ७९ क्युफिट, झ्यालको चौकस ४ थान, ढोकाको चौकस ५ थान, २१ थान पट्टा (फलेक) ट्याक्टरमा लोड गरी ल्याउँदै गर्दा शुक्रबार दिउँसो एक बजेको समयमा इलाका प्रहरी कार्यालय भिमानको टोलीले नियन्त्रणमा लिएको जनाएको छ ।
नियन्त्रणमा लिइएको काठ, ट्याक्टर सहित चारै जनालाई शुक्रबार नै सब डिभिजन वन कार्यालय भिमानलाई आवश्यक कारवाहीका लागि प्रहरीले बुझाएको छ ।
प्रतिक्रिया दिनुहोस !
