राजविराज: सप्तरीको राजगढ गाउँपालिकामा रहेको ठारी पोखरीमा बुधबार रहस्यमय मानव कंकाल फेला परेको छ ।
प्रहरी चौकी झुटकीदेखि करिब ३ सय मिटर पूर्व–दक्षिणतर्फ रहेको राजगढ गाउँपालिका–१ स्थित सार्वजनिक ठारी पोखरी जिर्णोद्धार गर्ने क्रममा मानव कंकाल फेला परेको जिल्ला प्रहरी कार्यालय सप्तरीले जनाएको छ ।
फेला परेको कंकाल राजगढ गाउँपालिका–१ झुटकीका धनई पण्डितकी श्रीमती ७५ वर्षीया रासोदेवी पण्डितको रहेको परिवारका सदस्यले दावी गरेपछि अन्तिम संस्कारका लागि जिम्मा दिइएको डिएसपी भुवनेश्वरप्रसाद साहले बताए ।
मानसिक सन्तुलन ठीक नभएकी रासोदेवी ०७६ साउन ३० गते रातिदेखि वेपत्ता थिइन् । कंकालमा बेरिएको साडी, कपडा र टुटेको दाँतको आधारमा परिवारले पहिचान गरेपछि विश्वस्त भएर मानव कंकाल पण्डित परिवारलाई जिम्मा दिएको डिएसपी साहले बताए ।
परिवारका सदस्यले कंकालको दावी गरेपछि डिएनए परिक्षणको पक्रिया भने अघि नबढाइएको डिएसपी साहले बताए ।
प्रतिक्रिया दिनुहोस !
