काठमाडौं: तथ्यांक सम्बन्धी सीप विकास गर्ने उद्देश्यले मुलुकमा हालसम्मकै ठूलो फेलोसिप कार्यक्रम सञ्चालन हुने भएको छ । यो कार्यक्रममा ५ सय भन्दा बढी नेपालीलाई सहभागी गराइनेछ ।
फेलोसिप कार्यक्रमको कुल बजेट करिब दुई करोड नेपाली रुपैँया बराबर छ । फेलोसिप कार्यक्रम विश्वभर नै तथ्यांकसम्बन्धी सीप सिकाउँदै आएको डाटा क्याम्पको विशेष सहयोगमा हुन लागेको हो ।
सहभागीहरुलाई तालिममा सघाउने र त्यसपछिका सम्भावित अवसरका खोजीमा सहजीकरण गर्न ओपन नलेज नेपाल र कोड फर नेपाल नामक दुई संस्थाले साझेदारी गरेका छन् । फेलोसिप कार्यक्रममा छनोट भएका व्यक्तिहरुले आफ्नो अनुकुलमा विज्ञ व्यक्तिबाट तथ्याकंसम्बन्धी सीप सिक्न पाउनेछन् ।
यस तालिमको अवसर पाएपछि उनीहरुले आफ्नो दक्षता नेपालमा मात्र नभई विश्व बजारमै तथ्यांक वैज्ञानिक (डाटा साइन्स), तथ्यांक इन्जीनीयर (डाटा इन्जिनियर) र तथ्यांक विश्लेषक (डाटा एनालिष्ट) जस्ता पदमा जागिर वा काम पाउनसक्ने सम्भावना रहन्छ । डाटा क्याम्पमार्फत् कुनै सहभागीले तोकिएको कोर्ष पूरा गरेपछि अरु सीप सिक्न चाहेमा उनीहरुका लागि आयोजकले थप सहयोग गर्ने जनाइएको छ ।
तथ्यांकसम्बन्धी फेलोसिप कार्यक्रम किन ?
अहिले विश्वमा हरेक कुराको डिजिटल रुपान्तरण भइसकेको छ । र, यस्तो अवस्थामा तथ्यांकसम्बन्धी सीपको टड्कारो आवश्यकता र महत्व रहेको महशुस भएको छ । तथ्यांक पत्ता लगाउने, त्यसबारे विश्लेषण गर्ने र प्रयोग गर्ने कामले आफ्नो व्यावसायिक क्षेत्रमा मात्र नभइ यसले एउटा अर्थपूर्ण जीवन बिताउन समेत सहयोग गर्छ ।
कुनै व्यक्तिले आफ्नो व्यक्तिले आफ्नो निजी र व्यावसायिक व्यक्तित्व विकास गर्न अत्याधिक इच्छुक छ र, आफ्नो समुदायमा भएका चुनौतीको सामना गर्न चाहन्छन्, भने त्यस्ता व्यक्तिका लागि यो फेलोसिप कार्यक्रम फाइदाजनक हुन सक्ने आयोजकले बताएको छ ।
यो कार्यक्रममा कसरी सहभागी हुने ?
ल्यापटक तथा कम्प्युटर र इन्टरनेटमा सहज पहुँच हुनेहरुले यो फेलोसिप कार्यक्रममा सहभागिता जनाएर त्यसको प्रमाणपत्र लिन पाउनेछन् ।
यो फेलोसिप कार्यक्रममा सहभागी भएकाहरुले भर्चुअल माध्यमबाट ओपन डाटा नेपाल, नेपाल म्याप, आस्क नेपाल र संग्रह जस्ता सिभिक टेक्नोलोजी र ओपन डाटाका उत्पादनहरुमा योगदान दिन सक्नेछन् ।
उक्त फेलोसिप कार्यक्रममा सहभागी हुन आयोजकले मुख्य गरी दुई वटा मापदण्ड तय गरेको छ । सहभागी हुन इच्छुक आवेदकले दुईदेखि तीन महिनासम्ममा हप्तामा कम्तिमा ५ देखि १० घण्टासम्म आफ्नो समय अनिवार्य छुट्याउन सक्ने हुनुपर्छ ।
यससँगै आवेदक नयाँ सीप सिक्न अत्यन्त जिज्ञासु र रुचीकर हुनुपर्छ । इच्छुक व्यक्तिले नेपालको जुनसुकै क्षेत्रबाट पनि आवेदन दिन सक्नेछन् । आवेदन दिन चाहने व्यक्ति विद्यार्थी, कर्मचारी वा कुनै काममा संलग्न नभएका व्यक्तिले पनि आवेदन दिन सक्नेछन् । आयोजकले खासगरी महिला र प्रदेश २ तथा ६ का तोकिएको मापदण्ड पुरा गरेका जोसुकै व्यक्तिलाई आवेदन दिन अत्यधिक प्रोत्साहन गरेको जनाएको छ ।
प्रतिक्रिया दिनुहोस !
