जोमसोम : मुस्ताङमा रहेको शिव मन्दिर पूननिर्माण भएको छ। घरपझोङ गाउँपालिका—३ पुथाङ एअरपोर्टमा अवस्थित ३२ वर्ष पुरानो जीर्ण शिव मन्दिर पुननिर्माण गरिएको हो । २०४६ सालमा कर्मचारी मिलनकेन्द्र मुस्ताङले निर्माण गरेको शिव मन्दिर पछिल्लो समय संरक्षणको अभाव जीर्ण बनेको थियो । जीर्ण बनेको मन्दिरलाई केन्द्रको पहलमा नगद तथा श्रमदान र जिन्सी चन्दा संकलन गरी पुननिर्माण गरिएको कर्मचारी मिलनकेन्द्र मुस्ताङका सचिव बृजकिशोर चौरासियाले जानकारी दिए ।
मुस्ताङमा कार्यरत कर्मचारीहरुले विशेष हिन्दु चाडपर्वमा उक्त मन्दिरमा पूजाआजा गर्ने गर्छन् । मुस्ताङ सदरमुकामको पुथाङ एअरपोर्ट नजिकैको पश्चिमतर्फ करिब एकसय मिटर अग्लो थुम्कोमा शिव मन्दिर छ ।
शिव मन्दिर पूननिर्माणका लागि विभिन्न दाताबाट ६ लाख ५३ हजार नगद र ३ लाख १५ हजार श्रमदान तथा जिन्सी गरी कुल ९ लाख २१ हजार संकलन गरिएको थियो । मन्दिर पूननिर्माणका लागि मुस्ताङमा कार्यरत कर्मचारी,निर्माण व्यवसायी तथा सरोकारवाला निकायले आर्थिक सहयोग गरेका थिए ।
यसअघि ढुङ्गा माटोले निर्माण गरिएको शिव मन्दिरमा सिमेन्ट प्लास्टर गरी रङरोगन गरी चिटिक्क पारिएको छ । पुथाङ एअरपोट देखि शिव मन्दिर सम्म पुग्ने रेलिङसहितको सिढी बाटो पुननिर्माण ,मन्दिरको चारकिल्लामा रेलिङ जडान र मन्दिर परिसरमा छप्पनी ढुङ्गा बिच्छ्याउने लगायतको काम भएको मिलनकेन्द्रले जनाएको छ ।
मुस्ताङमा शिव मन्दिर पुननिर्माण भएसंगै मुस्ताङमा हिन्दु धर्ममा आस्थावान कर्मचारी, पर्यटक र सर्वसाधारणलाई पूजाआजा गर्न सहज भएको छ । मन्दिर पुननिर्माण भएसंगै शिव मन्दिर निकै आर्कषण र लोभलाग्दो देखिएको छ ।
शिवमन्दिर पुननिर्माण केवल पुजाआजाका लागि मात्र नभई धार्मिक पर्यटकीय गन्तब्य तथा जोमसोम बजारको दृष्यावलोकनकेन्द्र बन्नसक्ने अनुमान गरिएको छ । शिव मन्दिर पुननिर्माण भएको र त्यसमा धार्मिक थप धार्मिक संरचना निर्माण गर्न सकिएमा मुस्ताङ आउने पर्यटकको उपस्थिति वृद्धि हुने मिलन केन्द्रको दावी छ ।
आज महाशिवरात्रीको दिन कर्मचारी मिलन केन्द्रले पुननिर्माण गरिएको शिव मन्दिरमा धार्मिक अनुष्ठान समेत गरेको छ । अधिकांश बौद्ध धर्मालम्बी रहेको मुस्ताङमा बुद्ध धर्मका दर्जनौं गुम्बाहरु छन् । तर, पुननिर्माण गरिएको शिव मन्दिर मुस्ताङमा एक मात्र हो।
प्रतिक्रिया दिनुहोस !
