जोमसोम: हिन्दु तथा बौद्ध धर्मालम्बीहरुको साझा तिर्थस्थल मुस्ताङको मुक्तिनाथ मन्दिरमा धार्मिक पर्यटकको चहलपहल बढ्न थालेको छ ।
कोरोना माहामारीको अवधिमा ९ महिना शुन्य रहेको मुस्ताङको मुक्तिनाथमा धार्मिक पर्यटकको आउजाउ बढेसँगै तिर्थालुको रौनक देखिएको हो ।
जाडो मौसम सकिएपछि नै आन्तरिक तिर्थालुको संख्या बढेको हो । मुक्तिनाथ विकास समितिका कार्यालय सचिव रविन सुवेदीले मुक्तिनाथमा दिनप्रतिदिन धार्मिक तिर्थालुको संख्या वृद्धि हुँदै गइरहेको जानकारी दिए।
उनका अनुसार कोरोना माहामारीका कारण गत वर्षको फागुन ११ गतेदेखि ९ महिना पूरै बन्द रहेको मुक्तिनाथ पुस २१ गते सर्वसाधारणका लागि दर्शन खुल्ला भएको हो ।
'मुक्तिनाथमा दिनहुँ ५/६ सय आन्तरिक तिर्थालु आइरहेका छन् । अझै यो संख्या वृद्धि हुँदै जाने हाम्रो अनुमान छ, उनले भने‘अब त कोभिड भ्याक्सिन पनि आइसक्यो, मुक्तिनाथ मन्दिर बिस्तारै कोरोना अघिकै अवस्थामा लयमा फर्किन थालेको छ ।’
मुक्तिनाथमा यतिबेला श्रद्धालु तिर्थयात्रीको भीडले मन्दिर परिसर भरिभराउ हुन थालेको हो । मुक्तिनाथ पुगेका तिर्थालुले पूजाआजा, दर्शन, धार्मिक अनुष्ठान, स्नान र नित्यकर्म आदि गर्छन् ।
यस्तै, मन्दिर परिसरमा फोटो खिच्ने र मुस्ताङको रमणीय फरक भूगोलको अवलोकन गरी आनन्द लिने गरेको पाइएको छ।
मुस्ताङमा आन्तरिक पर्यटक बढेसँगै मुस्ताङका पर्यटन व्यवसायी उत्साही भएको पाइएको छ । लामो समय कोरोनाका कारण सुस्ताएको मुस्ताङको पर्यटन कोरोना जोखिम कम भएपछि पर्यटकीय गतिविधि बढेको मुक्तिनाथका पर्यटन व्यवसायी सुरज गुरुङले जानकारी दिए । उनले यो समय मुक्तिनाथ दर्शन तथा मुस्ताङ घुम्ने अनुकुल मौसम भएकाले पर्यटक बढेको बताए ।
कोरोनाका कारण १२ महिना पूरै बन्द रहेको पोखरा—जोमसोम हवाइ सेवा पनि मार्च ८ देखि सञ्चालनमा आइसकेको छ । मुस्ताङमा तारा एअर र सुमित एअरले दैनिक ८ वटा उडान समेत गर्ने गरेको जोमसोम नागरिक उड्यन कार्यालयले जनाएको छ ।
कार्यालयका अनुसार हवाइ सेवा मार्फत् भारतीय तथा आन्तरिक पर्यटक आउने गरे पनि तेश्रो मुलुकका पर्यटक भने आउन सकेका छैनन् । यस्तै, पोखराबाट बेनी हुँदै दैनिक ७ सय पर्यटक मुस्ताङ आउने गरेको जिल्ला ट्राफिक कार्यालय मुस्ताङले जनाएको छ ।
प्रतिक्रिया दिनुहोस !
