जोमसोम: मुस्ताङमा नेपाली सेनाले 'सफा हिमाल' अभियान सुरु गरेको छ । सरकारको राष्ट्रिय अभियान २०२१ अन्तर्गत प्रकृति तथा पर्यावरण संरक्षण तथा जलवायु परिवर्तनको असर न्युनिकरण गर्न सफा हिमाल अभियान सुरु भएको हो ।
अभियान अन्तर्गत सगरमाथा लगायत ६ वटा हिमाल सरसफाइ गर्ने कार्यक्रम सेनाले तय गरेको मुस्ताङको जोमसोम स्थित सैनिक उच्चशिखर शिक्षालयमा आयोजित कार्यक्रममा जनाएको हो ।
सेनाले हिमाली जिल्ला मुस्ताङमा ‘सफा हिमाल’ कार्यक्रममा सेनाका ५० जना सहभागी गराउने जनाएको छ । मुस्ताङको खम्पा हेडक्वाटर कैसाङ क्याम्प क्षेत्र र जोमसोममा तालिम सञ्चालन गरेको जनाएको छ । तालिम लिइरहेका सेनाको टोलीबाट हिमाल सरसफाइ कार्यक्रम सम्बन्धी जानकारी एंव सरसफाइ/आरोहरण दौरान आइपर्ने समस्या र चुनौती बारे प्रशिक्षण गरिएको छ ।
शुक्रबार शिक्षालयको क्याम्पमा ‘हिमाल सफा’अभियानमा आउनसक्ने विपद् उद्दार सम्बन्धी नाटक (डेमो) प्रर्दशन गरियो । अभियानको नेतृत्व गर्ने सेनाको टोलीले अन्तरक्रिया तथा कार्यक्रमबारे स्थानीय जनप्रतिनिधि, प्रशासन, स्थानीय तह, सुरक्षा निकाय, एक्याप र अन्य निकायलाई जानकारी गराएको छ । अभियान अन्तर्गत मुस्ताङमा खटिएको टोलीले धवलागिरि हिमाल सरसफाइ गर्ने तयारी गरेको जनाएको छ । यसका लागि सरोकारवाला निकायसँग सहयोग र समन्वय गर्न छलफल गरिएको छ ।
सरकारको ‘सफा हिमाल’ अभियान अन्तर्गत प्रदुषण रोक्ने, जलवायु परिवर्तन न्युनिकरण गर्ने हिमाली अर्थव्यवस्था अभिवृद्धि गर्न सरकारलाई सहयोग गर्ने, पर्यटन प्रर्वद्धन तथा पर्वतारोहीलाई आकर्षित गर्ने र भावी पुस्ताको लागि हिमालको संरक्षण गर्ने लक्ष्य रहेको बताइएको छ । सेनाले जिम्मा पाएको यस अभियानमा नेपालका व्यवसायीक पर्वतारोही समेतलाई समावेश गराइने भएको छ ।
अभियानलाई वन तथा वातावरण मन्त्रालय, पर्यटन मन्त्रालय, पर्यटन विभाग र पर्यटन बोर्डले सहयोग गर्ने जनाइएको छ । अभियान मार्फत् नेपाली सेनाको स्रोत साधनको अधिकतम उपयोग गर्दै संकलित फोहोरको वर्गिकरण गर्ने, अभियानसँग समन्वय राख्ने, सरोकारवाला निकायको पहिचान र सहकार्य गर्ने र धेरै भन्दा धेरै आरोहीलाई बेसक्याम्प भन्दा माथिबाट फोहोर संकलन गर्ने लक्ष्य रहेको बताइएको छ ।
प्रतिक्रिया दिनुहोस !
