रोल्पामा एकैदिन २६ जनामा संक्रमण, संक्रमितको संख्या १२६ पुग्यो

रोल्पा : रोल्पा नगरपालिकाले जिल्लाको सदरमुकाम लिबाङमा ५० वेडको आइसोलेसन सेन्टर संचालनमा ल्याएको छ । पूर्वसभामुख एवं संघीय सांसद कृष्णबहादुर महराले सेन्टरको बुधबार उद्घाटन गरे ।

नगरपालिकाले सहिद प्रतिष्ठान भवनमा आइसोलेसन निर्माण गरेको हो । पूर्वसभामुख महराले सेन्टरको उद्घाटन गर्दै बढ्दो कोरोना संक्रमणबाट जोगिन सबैले सावधानी अपनाउन जरुरी रहेको बताए। प्रतिष्ठानको दुईतले भवनमा ५० वेड तयारी राखिएको मेयर पूर्ण केसीले बताए । सेन्टरमा डाक्टरसहितको स्वास्थ्यकर्मी रहनेछन् । 

रोल्पा अस्पतालका मेडिकल अधिकृत प्रकाशबहादुर बुढाथोकीका अनुसार नगर आइसोलेसन सेन्टरमा अक्सिजनसहित सेवा व्यवस्थापन गरिएको छ । सानाठूला गरी पाँचवटा अक्सिजन सिलिन्डर जडान गरिएको छ । अस्पतालमा उपलब्ध अक्सिजन सिलिन्डर जडान गरिसकेका छौँ,' डाक्टर बुढाथोकी भन्छन्,'संक्रमितको चाप बढ्यो भने अक्सिजन सिलिन्डर अभाव हुन्छ । त्यसका लागि थप अक्सिजन सिलिन्डरको जोहो गर्न आवश्यक छ ।'

नगर प्रमुख केसीले पूर्व उर्जा, जलस्रोत तथा सिंचाइमन्त्री वर्षमान पुनसँग स्वास्थ्य सामाग्रीको माग गरेको बताए।  माओवादी केन्द्रको नेता समेत रहेका पुनले स्वास्थ्य सामग्री पठाउने आश्वासन दिइसकेको बुझिएको छ ।

स्थानीय तहले कम्तीमा एकवटा आइसोलेसन सेन्टर बनाउने सरकारी निर्देशन नैछ । नगरले निर्माण गरेको सेन्टरको महत्त्व जिल्ला स्तरकै भएको बताइएको छ । समुदायस्तरमै फैलिएको कोरोनाबाट संक्रमित घरमै बसिरहेका छन् ।

संक्रमितलाई स्वास्थ्यमा जटिलता आएमा कम्तिमा अक्सिजनसहित उपचार गर्ने गरी नगर आइसोलेसनलाई विकास गर्नमा लुम्बिनी प्रदेश सांसद दिपेन्द्र कुमार पुनले जोड दिएका छन्  । उनले रुन्टिगढी गाउँपालिका कार्यपालिकाका कोरोना संक्रमित एक सदस्यको अक्सिजन लेवल कम भएको समेत जनाए । 

जिल्लाका ९ गाउँ पालिकाले पनि पालिकास्तरमा आइसोलेसन सेन्टर स्थापना र संचालना जोड दिएका छन् । तर, सेन्टर अक्सिजन सिलिन्डरविहीन छन् । प्रमुख जिल्ला अधिकारी नवराज सापकोटाले कोरोना संक्रमितको कन्ट्याक्ट् ट्रेसिङ गरी स्वाब संकलनमा जोड दिन स्थानीय तहसँग समन्वय गरिरहेको जनाए । 

जिल्ला स्वास्थ्य प्रमुख नोखराज पोख्रेलले आवस्यक स्वास्थ्य सामग्री जोहोमा खटिएको जानकारी दिए । एन्टिजेन्ट टेष्ट कीट, भिटिएम, अक्सिजन सिलिन्डर र पीपीई सेट तत्कालै आवश्य छ । 

जिल्लामा कोरोना संक्रमण जोखिम बढेकाले बुधबार बिहानबाट निषेधाज्ञा गरिएको छ । यहाँ सक्रिय संक्रमित १ सय २४ जना पुगेका छन् । अघिल्लो दिनसम्म ९८ जना संक्रमित रहेकोमा बुधबार मात्र २४ जना संक्रमित थपिएका छन् ।