बाजुरामा निरन्तर वर्षा, खोलाले बगाउँदा दुईजना वेपत्ता, एक घर भत्कियो, राजमार्ग अवरुद्ध
जेठ ३१, २०७८ सोमबार १६:४५:०
बाजुरा : बुढीनन्दानगरपालिका ३ की एक महिलालाई खोलाले बगाउँदा बेपत्ता भएकी छन् । बेपत्ता हुनेमा सोही नगरपालिका ३ का मनबहादुर लुहारकी ३५ वर्षीया श्रीमती मोतीकला लुहार रहेको जिल्ला प्रहरी कार्यालयका प्रवक्ता तथा प्रहरी निरीक्षक धनदेव साउँदले जानकारी दिएका छन् । सोमबार बिहान धानको बेर्ना गोढ्न जाने क्रममा चिप्लिएर बड्डीगाड खोलाले बगाएपछि मोतीकला बेपत्ता भएकी हुन ।
बेपत्ता महिलाको खोजीकार्य भइरहको प्रहरी निरीक्षक साउदले बताए। त्यसैगरी त्रिबेणी नगरपालिका ५ कम्नीमा एक ११ वर्षीय बालक बेपत्ता भएका छन्। लगाताको वर्षाका कारण गाउँनजिकैको भलखोला उर्लेर आएपछि हेर्न जाने क्रममा घुर्या बुढाका अन्दाजी १०/११ वर्षीय छोरा वेपत्ता भएको त्रिवेणी नगरपालिका प्रवक्ता प्रेम थापाले जानकारी दिए।
घटनास्थलमा प्रहरी टोली गएको छ । टेलिफोन अवरुद्धका कारण प्रहरी टोलीसमेत सम्पर्कमा नरहेको जिल्ला प्रहरी कार्यालयले जानकारी दिएको छ ।
लगातारको वर्षाका कारण बाजुरा सदरमुकाम जोड्ने मुख्य साफेमार्तडी राजमार्ग अवरुद्ध भएको छ । राजमार्ग अन्र्तगत बार्जुगाडी, ताँप्रीसेरा, बल्दे, द्धारी, तिपाडा लगाय तदर्जनौं ठाउँमा पहिरो खसेपछि राजमार्ग अवरुद्ध भएको जिल्ला प्रहरी कार्यालयका प्रहरी निरीक्षक धनदेव साउँदले जानकारी दिए ।
बार्जुगाडा सडकमा पहिरो गएको छ। ताप्रीसेरामा बुढीगंगा नदीले सडक बगाएर सडक भएको ठाउँमा नदी बग्न थालेको छ । सडकमा नदी बग्न थालेपछि पदैल यात्रीलाई समेत एक घण्टाको उकालो चढेर पैदलयात्रा गर्न वाध्य छन्। लगातार पानी परिरहेकाले सडक तत्काल खोल्न नसकिने सडक डिभिजनले जानकारी दिएको छ ।
त्यस्तै बाजुराको पूर्वी उत्तरी क्षेत्र जोड्ने कार्तडी कोल्टि सडक अवरुद्ध भएको छ । बाउली, अनाई, दानसागुलगायत खोलामा पानीको बहाव बढेको छ। सडक ठाउँ ठाउँमा भासिएकाले अबरुद्ध भएको छ । सडक अवरुद्ध हुँदा जिल्ला सदरमुकाम तथा जिल्ला बाहिर जान समेत स्थानीयलाई समस्या भएको छ ।
प्रतिक्रिया दिनुहोस !
