दैलेख : लगातारको वर्षात्का कारण दैलेखमा ६ घर भत्किएका छन् । दुल्लु नगरपालिका ९ मा ६ वटा घर भत्किएको हो । दुल्लु नगरपालिका–९ का वडाध्यक्ष रणबहादुर बोहोराका अनुसार प्यादुरा गाउँ र धामीगाउँमा गरी ६ घर भत्किएका हुन् । प्यादुराका ३ वटा घर र धामीगाउँका ३ वटा घर भत्किएको वडाध्यक्ष बोहोराले जानकारी दिए । उनका अनुसार भत्किएका मध्ये दुईवटा घर पूर्णरुपमा क्षति भएको छ ।
‘अहिले आंशिक र पूर्णरुपमा क्षति भएका घरका परिवारका सदस्यलाई नजिकका आफन्तको घरमा राखिएको छ,’ वडाध्यक्ष बोहोराले भने ‘वर्षातका कारण घर भत्किँदा मानवीय क्षति भने भएको छैन् ।’ प्यादुरा गाउँका हिरा भण्डारी, उर्मिला विक र मन्दरा भुलको घर भत्किएको हो । तीन घरका १४ जना प्रभावित बनेका छन् । यस्तै धामीगाउँका खम्ब विक, झुपा कामी र रामसरा सार्कीको घर भत्किएको हो । यहाँका तीन घरका १२ जना प्रभावित भएको वडाध्यक्ष बोहोराले बताए ।
लगातारको वर्षातका कारण जिल्लाभर कुनै मानवीय क्षति नभएको प्रहरीले जनाएको छ । ‘कर्णाली राजमार्गको ठाउँ–ठाउँमा पहिरो गइरहेको छ,’ अन्य सहायक सडकहरुमा पनि यातायातका साधन सञ्चालन हुन कठिन छ,’ डिएसपी अनुपम श्रेष्ठले भने । 
दैलेख सुर्खेत सडक खण्डअन्तरगर्त चुप्रामा हिलाम्य सडक । तस्बिर : हिक्मतबहादुर नेपाली
राजमार्गमा गएको पहिरोलाई पन्छ्याउँदै सडक सुचारु गरिएको डिएसपी श्रेष्ठले जानकारी दिए । त्यसबाहेक दैलेख सुर्खेत सडक खण्ड, निर्माणाधिन मध्यपहाडी राजमार्ग लगायतका स्थानीय तहको केन्द्र जोड्ने मुख्य सडक र सहायक सडकमा यातायातका साधन सञ्चालन हुन सकेका छैनन् ।
जिल्ला प्रशासन कार्यालय दैलेखले जिल्लाभरका सर्वसाधरणलाई सतर्क रहन आग्रह गरेको छ । जल तथा मौषम विज्ञान विभाग र राष्ट्रिय विपद् जोखिम न्यूनिकरण तथा व्यवस्थापन प्राधिकरणको प्रक्षेपण अनुसार यस वर्षको मनसुन लामो अवधिसम्म रहने देखिन्छ । प्रशासनद्धारा जारी सूचनामा यस पर्ष धेरै वर्षात हुने र जसका कारण धनजनको ठूलो क्षति हुनसक्ने सम्भावना देखिएको उल्लेख छ ।
दैलेख जिल्लास्थित कर्णाली नदी, लोहोरे, छामघाट, रामाघाट, कट्टी, पादुका खोला लगायतका नदी र खोलामा पानीको बहाब बढ्न गई तटीय क्षेत्रमा बाढी आउन सक्ने र भिरालो ठाउँमा पहिरो जानसक्ने जोखिम रहेको प्रशासनले जनाएको छ । प्रशासनले तटिय क्षेत्र र भिरालो ठाउँमा बस्ने स्थानीयलाई सम्भावित विपद्को जोखिम न्यूनिकरणका लागि उच्च सतर्कता अपनाउन आग्रह गरेको छ ।
प्रतिक्रिया दिनुहोस !
