दैलेख : कोभिड–१९ बाट प्रत्यक्ष मारमा परेका गरिब तथा विपन्न घरपरिवारले गाउँमै रोजगारी पाएका छन् । कोभिडको मारमा परेका ग्रामिण भेगमा बसोबास गर्ने नागरिकहरुले गाउँमै रोजगारी पाएका हुन् ।
दैनिक ज्यालामजदुरी गरी जीविकोपार्जन गर्दै आएका घर परिवारलाई युएसएआइडी मर्सिकोरको सहयोगमा सेवक दैलेखद्धारा सञ्चालित भकारी कार्यक्रममार्फत रोजगारी प्रदान गरिएको हो । कार्यक्रममार्फत गरिब तथा विपन्न वर्गलाई लक्षित गरी दैलेख जिल्लाको कर्णाली करिडोरमा कार्यान्वयनमा छ ।
‘कामका लागि नगद’ कार्यक्रम अन्तरगर्त दैलेखको पश्चिम क्षेत्रमा पर्ने ठाटीकाँध गाउँपालिका–२ सेरीपाटा र टमटान्लाका एक सय १४ घरधुरीलाई रोजगारी दिइएको छ । कोभिडको असर परेका तथा बेरोजगार रहेका व्यक्तिहरुले २१ दिनको रोजगारी पाएका हुन् । ठाटीकाँध गाउँपालिका र भकारी कार्यक्रमको ४० लाख बराबर लगानीमा खानेपानी योजना निर्माणको काम सम्पन्न हुनेछ ।
रोजगारी पाएकाहरुले सोहि खानेपानी योजना निर्माणको काम गर्नेछन् । उक्त दुई समुदायका काममा जान नसक्ने अपाङ्गता भएका व्यक्ति, सुत्केरी, बुद्धबृद्धा र विभिन्न व्यक्तिहरुलाई निसर्त रकम हस्तान्तरणको कार्यक्रम समेत सञ्चालन भएको कार्यक्रम संयोजक शैलेश कुमार मल्लले बताए ।
दुल्लु नगरपालिका–१३ औल भिनाडीमा ७० घरधुरी लाभान्वित हुनेगरी ८ लाख बराबरको ग्रामिण सडक सुधारको काम सञ्चालन भइरहेको मल्ले बताए । उनका अनुसार भैरबी गाउँपालिका–५ मिज्माखोलामा ६६ घरपरिवार लाभान्वित हुनेगरी ८ लाखको सिंचाई कुलो निर्माण कार्य भईरहेको छ । रोजगारीमुलक कार्यक्रम ठाटीकाँध गाउँपालिकामा अध्यक्ष धीरबहादुर शाहीर, दुल्लु नगरपालिकामा उपमेयर विष्णु थापा र भैरबी गाउँपालिका–५ मा वडाध्यक्ष हेमलाल जैसीले उद्घाटन गरेका थिए ।
दिर्घकालिन रुपमा विपद् तथा आपत्तकालिन अवस्थामा खाद्यान्न उपलब्धतामा सहयोग गर्नुका साथै आपत्तकालिन र विपद् जोखिम न्यूनिकरणमा काम गर्दै आएका भकारी कार्यक्र अन्य समुदायमा पनि सञ्चालन हुने मल्लले जानकाबरी दिए । ‘कामका लागि नगद’ कार्यक्रम अन्तरगर्त गाउँमै रोजगारी पाएकाहरुले कोरोनाका कारण समस्यामा परेका बेला जीविकोपार्जनमा राहत पुग्ने अपेक्षा गरेका छन् ।
प्रतिक्रिया दिनुहोस !
