हत्यामा संलग्न युवकलाई अनुसन्धानका लागि सात दिन म्याद थप

जाजरकोट : आपसी लेनदेनको विषयमा झगडा हुँदा एक युवाको ज्यान गएपछि पक्राउ परेका कुशे गाँउपालिका ८ जिन्तालाका विमलप्रकाश सिंहलाई अनुसन्धानका लागि जिल्ला अदालतले सात दिनको म्याद थप गरेको छ । 

विमलको कुटपिटबाट कुशे गाँउपालिका ८ जिन्तालाका ३५ वर्षीय इन्द्रबहादुर सिंहको शनिबार बिहान घरमै मृत्यु भएको थियो । प्रहरी निरीक्षक खुमानन्द पाण्डेका अनुसार एक सामुदायिक संस्थाको रकम सम्बन्धमा विवाद हुँदा उनीहरुबीच झगडा भएको थियो । 

शुक्रबार पधेरीखोला सामुदायिक संस्थाका सदस्य र पदाधिकारी भेला भएका थिए । छलफलपछि अन्य सदस्य आ-आफ्नो घर फर्के पनि केही युवाहरु बेलुका जिन्तालमै कुखुरा काटेर जाँड खान थालेका थिए । 

विमल संस्थाका अध्यक्ष हुन भने मृतक इन्द्र सचिव हुन् । जाँड खाने क्रममा उनीहरु विच संस्थाको रकमका विषयमा केही समय विवाद भयो । विवाद पछि बिमल एक्कासी आक्रोशमा आएर र्चिपटले इन्द्रको टाउकोमा हिर्काएपछि उनी बेहोस भएको प्रहरी निरीक्षक पाण्डेले बताए । 

घाइते भएका इन्द्रलाई घरमा लगिएको र राती दुई बजे उनको ज्यान गएको पाण्डेले बताए । प्रहरीले कुटपिटमा संलग्न विमललाई शनिबार नै भेरीनगरपालिका २ बाहुनथानाबाट पक्राउ गरेको थियो । अनुसन्धानको क्रममा उनले कुटपिट गरेको स्वीकार गरेको प्रहरी निरीक्षक पाण्डेले बताए ।