पोखरा : पत्रकारको आवरणमा जबरजस्ती करणीको मुद्दा मिलाइदिन्छु भन्दै ठगी गर्ने पोखराका भोजराज त्रिपाठीलाई कास्की प्रहरीले पक्राउ गरेको छ । पोखरा महानगरपालिका १८ सराङकोटका ४९ वर्षीय भोजराज त्रिपाठीलाई कास्की प्रहरीले बुधबार पक्राउ गरेको हो ।
त्रिपाठीले अन्य २ पुरुषसँग मिलेर करणी मुद्दाका प्रतिवादीलाई बचाइदिने भन्दै १ करोड रुपैयाँ मागेका थिए । ‘प्रहरी, वकिल, अदालतसँग सेटिङ छ, १ करोड रकम दिए मिलाइदिन्छु नत्र १५ वर्ष जेल जान्छ भनी आश्वासन दिएर पीडकबाट ठगी गरेको पाइएपछि पक्राउ गरिएको हो,’ कास्की प्रहरी प्रवक्ता सुवास हमालले बताए ।
प्रहरीले यसअघिका घटनामा संलग्न भएको पाएपछि फागुनमै सूर्यलाल खड्का र कमानबहादुर तामाङलाई पक्राउ गरेको थियो । त्रिपाठी भने त्यसयता फरार थिए । त्रिपाठीले ‘कम्युनखबर’ को पत्रकार रहेको बताउँदै आएका थिए । उनलाई प्रहरीले कम्युनखबरको प्रेसकार्डसँगै पक्राउ गरेको छ ।
प्रतिक्रिया दिनुहोस !
