उदयपुर : पहाडी क्षेत्रमा लगातारको वर्षाले सडक अवरुद्ध भएका छन् । पानी नरोकिँदा उदयपुरको ग्रामिण भेग रौतामाई, ताप्लि र लिम्चुङबुङ गाउँपालिकाका केन्द्र र सदरमुकाम आवतजावत गर्ने सडक अवरुद्ध भएका हुन् ।
वर्षासँगै झरेको पहिरोले रौतामाई गाउँपालिकाको केन्द्र भुट्टार, ताप्लिको रुपाटार र लिम्चुङबुङको वरहा पुग्ने सडक अवरुद्ध भएको छ । गाउँपालिकालाई सदरमुकाम गाईघाट र कटारी बजारसँग जोड्ने सडक अवरुद्ध हुँदा सर्वसाधारणले सास्ती खेप्नुपरेको रुपाटारका शेरजङ ठकुरीले बताए ।
त्यसैगरी राष्ट्रिय गौरवको आयोजना मदन भण्डारी लोकमार्गको गाईघाट–कटारी खण्डको ठाउँ–ठाउँमा पहिरोपछि सडक अवरुद्ध भएको छ । सगरमाथा लोकमार्गको गाईघाट–दिक्तेल, सिद्धिचरण लोकमार्गको मिर्चैया–घुर्मि सडकखण्डमा पहिरो गएपछि यातायातका साधनहरु पहिरो पन्छाउँदै मुस्किलले आवतजावत गरिरहेका छन् ।
अवरुद्ध सडक सञ्चालनका लागि गाउँपालिकाले प्रयास जारी राखेपनि बर्षा नरोकिएकाले सूचारु गर्न नसकिएको ताप्लि गाउँपालिकाका अध्यक्ष उद्धवसिंह थापाले बताए । उनले भने, ‘आवागमन सूचारु गर्न आज पहिरो पन्छाएर सफा गर्यो, रातभर पानी पर्छ, भोली उस्तै हुन्छ, लगानी व्यर्थ भइरहेको छ ।
‘पानी नरोकिएकाले सडक मर्मतका लागि केहि दिन पर्ख र हेरको रणनीतिमा छौं, उनले भने, ‘दुई/तीन दिन पानी रोकिएर घाम लाग्यो भने मर्मत सुरु गर्छौ ।' सडक नियमित सूचारु गर्न पालिकाको स्काभेटर तयारी अवस्थामा रहेपनि पानी नरोकिएका कारण समस्या भएको उनको भनाइ छ ।
सडक अवरुद्ध भएसँगै दुर्गमका लागि खाद्यन्नलगायत दैनिक उपभोग्य सामग्रीको ढुवानीमासमेत समस्या भएको स्थानीयको भनाइ छ । उदयपुरगढी गाउँपालिका केन्द्र जोड्ने नेपालटार–गढी सडक बाहेक अन्य ग्रामीण सडकहरु अवरुद्ध भएको स्थानीयले बताएका छन् ।
सिद्धिचरण लोकर्मागको ठाउँ–ठाउँमा सडक अवरुद्ध हुँदा खोटाङ, सोलु र ओखलढुङ्गाका लागि सवारी आवगमनमा कठिन भएको छ । पहिरो जानेक्रम बढेसँगै माथिल्लो पहाडी क्षेत्रमा सवारी साधन सञ्चालन गर्न गार्हो कटारी नगरपालिकाका प्रमुख ज्ञानेन्द्र श्रेष्ठले बताए ।
निर्माणधीन मदन भण्डारी लोकर्मागमा करिब एकदर्जन खोलामा पुल निर्माण सकिएको छैन। ग्रामीण भेगमा मापदण्ड विपरित जथाभावी खनिएका सडकमा पहिरो गएपछि पैदलयात्रीलाई समेत यात्रामा कठिनाइ भएको छ ।
गाडी नचलेपछि पैदलयात्राबाट माझखर्क हिँडेका लाक्पा शेर्पा भन्छन्, ‘यातायातका साधन चलेपछि पैदलयात्रा गरिने गाउँघरका गोरेटा बाटोहरु सबै मेटिए सडकबाट हिँड्दा कतिबेला पहिरोले पुर्ला भन्ने पीर छ ।'
भेल बाढीले एक महिनादेखि यातायातका साधन रोकिँदा माथिल्लो भेगमा खाद्यान्नलगायत दैनिक उपभोग्य सामग्रीको अभाव हुन थालेको छ । ‘पहिला जस्तो ढाकर, खच्चरमा बोकेर खाद्यन्य आपूर्ति गर्ने अवस्था छैन,’ रौतामाई गाँउपालिका १ का वडाध्यक्ष रुद्र कार्कीले भने, ‘सडक सूचारु नहुँदा सहरबाट खाद्यन्नलगायतका सामग्री ढुवानी गरेर ल्याउन सक्ने अवश्था छैन्, केहि दिन भित्रमा सूचारु गर्न नसक्ने हो भने अनिकाल हुनसक्छ ।
मापदण्ड विपरित हचुवाका भरमा मेसिन लगाएर निर्माण गरिएका दुर्गमका दर्जनौं कच्ची सडकका कारण यातायातका साधन मात्र अवरुद्ध छैनन् बस्ती नै पहिरोको उच्च जोखिममा छन् । वातावरणीय प्रभाव मुल्यांकन (इआइए) नै नगरी स्थानीय तहले हचुवाको भरमा सडक निर्माण गरेको स्थानीयको आरोप छ।
प्रतिक्रिया दिनुहोस !
