परासी कांग्रेस: विवादपछि वडा अधिवेशन अवरुद्ध, कतै माइन्युट च्यातियो, कतै उजुरी

परासीः नेपाली कांग्रेस पश्चिम नवलपरासी वडा अधिवेशनको परिणाम तीन दिनसम्म आउन सकेको छैन । तीन दिनअघि उद्घाटन भएको अधिवेशनले निर्वाचन गराए पनि गुट विवादका कारण नयाँ नेतृत्व चयनको प्रक्रिया अन्योल बनेको छ ।

गुट विवादका कारण कार्यकर्ताबीच तिब्र विवाद हुँदा कतै माइन्युट च्यातिका छन् भने कतै परीणामप्रति असहमति जनाउँदै उजुरी परेका छन् । केही वडामा हुन नसकेको चुनाव आइतबार भइरहेको छ । जिल्लामा प्रतिनिधिसभा सदस्य एंव कांग्रेस केन्द्रीय सदस्य देवेन्द्रराज कँडेल र संविधानसभा सदस्य विक्रम खनालका दुई गुट छन् ।

यसैबीच रामग्राम नगरपालिका–११ मा भएको अधिवेशनमा पराजित भएपछि निर्वाचनको माइन्युट च्यातिएको छ । सो वडामा सबै पदमा सहमति भएको थियो । वडा सभापतिमा मात्र भएको निर्वाचनमा पराजित उमेदवारका व्यक्तिले माइन्युट च्यातेको भन्दै प्रतिष्पर्धी गुटका कार्यकर्ताहरु आक्रोशित छन् । मतगणना सकिएर घोषणा गर्न जाने क्रममा पराजित उमेदवारका व्यक्तिहरु एक्कासी आवेगमा आएर हातमा बोकेको माइन्युट च्यातेको मतदान अधिकृत धु्रव आचार्यले बताए ।

सभापतिका उमेदवार भवानी शंकर चौधरीले १८ मत ल्याएर विजयी भएका छन् भने उनका प्रतिस्पर्धी श्रीकान्त कलवारको १६ मत आएको छ । चौधरी खनाल गुटका हुन् भने कलवार कँडेल गुटका हुन् । मत परीणामबारे जिल्लाको निर्वाचन समितिमा जानकारी दिएको आचार्यले बताए ।

यता सुस्ता गाउँपालिक–५ को अधिवेशनमा मनोनयन पत्र दर्ता नगरी निर्वाचन परिणाम घोषणा गरेको भन्दै पार्टी जिल्ला निर्वाचन समितिमा उजुरी परेको छ । निर्वाचनमा विजयी भएका उमेदवारलाई निर्वाचन समितिले प्रमाण पत्र समेत दिइसकेपछि उजुरी परेको हो ।

दुबै गुटले निर्वाचनमा जाने सहमति गरेपछि चुनाव भएको थियो । विजयी हुने सबै खनालका गुटका हुन् । तर कँडेल गुटका कार्यकर्ताले प्रक्रिया पूरा नगरी निर्वाचन गराएको भन्दै उजुरी दिएपछि चुनावबारे अन्योल उत्पन्न भएको छ । २५ जना क्षेत्रीय प्रतिनिधिमध्ये आरक्षण र केही समानुमातिकका गरी १० क्षेत्रीय प्रतिनिधिमा दुई गुटले सहमति गरेपछि निर्विरोध भएको थियो । वडा सभापति र अन्य १५ जना क्षेत्रीय प्रतिनिधिबीच सहमति नजुटेपछि चुनाव भएको हो ।

दुई गुटको विवादका कारण सुरुको दिन निर्वाचन हुन सकेको थिएन । भोलिपल्ट भएको चुनावमा दुवै पक्षका उम्मेदवारले ढिलो भएका कारण मनोनयन पत्र पछि बुझाउने सहमतिमा चुनाव गराएको मतदान अधिकृत अर्जुन पाण्डेले बताए ।

‘उम्मेदवार वापत लाग्ने दस्तुर लिए । सबैले मनोनयन पत्र पछि बुझाउँला भनेपछि पार्टीको आन्तरिक कुरा भनेर मैले पनि विश्वास गरेँ । सहमतिमै भएको हो । नतिजा स्विकार गर्न नसकेपछि अप्ठ्यारोमा पारे’ पाण्डेल भने । निर्वाचनमा २ सय ७१ मत खसेको थियो । विजयी हुने र पराजित हुने उम्मेदवारहरुको मत अन्तर २ सयको हाराहारीमा रहेको पाण्डेले बताए ।

कांग्रेस जिल्ला निर्वाचन अधिकृत बाबुराम पाण्डेले उजुरी आएकोले त्यसबारे के गर्ने भन्ने बारे छलफल हुने बताए । यसैबीच गुट विवादकै कारण जिल्लाको सबै वडाको नतिजा आउन सकेको छैन । कसैले चुनाव गर्ने र कसैले सहमति गर्ने भन्ने विवादले नतिजा आउन ढिला भएको हो । ७ स्थानीय तहमा ७४ वडा छन् । सबै पालिकाहरुको नतिजा आए पनि उजुरीबाहेक रामग्राम नगरपालिकाका ३ वटा वडाको नजिता आउन बाँकी रहेको पाण्डेले बताए । गुटकै कारण विवाद हुँदा रामग्राम नगरपालिका वडा नं. १५ र १६ को निर्वाचन आइतबार दिउँसोबाट सुरु भएको छ । जिल्लाबाट १३ सयको हाराहारीमा क्षेत्रीय प्रतिनिधि चयन हुने निर्वाचन समितिले जनाएको छ ।