काठमाडौँ: मिस नेपाल प्रतियोगिता सुरु भएको २७ वर्ष भइसक्यो । यस अवधिमा २५ सुन्दरीहरु मिस नेपाल घोषित भए । मिस नेपालको ताजले कुनै पनि युवतीलाई उसको करिअर उकास्न सहयोगी बन्ने आम मान्यता छ । तर हालसम्म मिस नेपाल घोषित भएका सुन्दरीहरु अचेल कहाँ छन् के गर्दैछन् ? उनै २५ जना पूर्व मिस नेपालको पछिल्लो अवस्थाबारे जानकारीमूलक विवरण यहाँ प्रस्तुत छ:
रुवी राणा
नेपालको पहिलो मिस नेपाल विजेता हुन् रुवी राणा । १९९४ मा पहिलो पटक मिस नेपाल बनेकी उनी नेपाली सेनाका एक अधिकृतसँग विवाह गरिन् । पछिल्लो समय उनले जावलाखेलमा ब्यूटीपार्लर साथै बूटिक सञ्चालन गर्दैआएकी छन् । अभिनय तथा मोडलिङमा आफ्नो सीप देखाउन नपाए पनि उनका टिकटक भिडियो भने चर्चित बन्ने गरेका छन् ।
सुमी खड्का
सुमी खड्का सन् १९९५ मा दोस्रो पटक मिस नेपाल बनेकी हुन् । कुनै बेला चलचित्र क्षेत्रमा चर्चित मोडल तथा अभिनेत्रीको रुपमा चिनिएकी सुमी पछिल्लो समय चलचित्रमा खासै देखिएकी छैनन् । 'एक नजर,' 'ग्रहण' लगायत फिल्ममा उनले अभिनय गरेकी थिइन् ।
पुनम घिमिरे
पुनम घिमिरे सन् १९९६ मा तेस्रो मिस नेपाल घोषित भएकी थिइन् । मिस नेपाल बनेलगत्तै अध्ययनका लागि अमेरिका पुगेकी उनी १५ वर्षपछि नेपाल फर्केकी थिइन् । पछिल्लो समय उनी आफ्नै व्यवसायमा व्यस्त छिन् ।
झरना बज्राचार्य
कुनै बेला फिल्म क्षेत्रमा व्यस्त झरना बज्राचार्य पछिल्लो समय घर गृहस्थीमै सिमित छिन् । उनी अन्य मिस नेपालको तुलनामा कम उमेरमै अर्थात् १६ वर्षको छँदा सन् १९९७ मा मिस नेपाल बनेकी थिइन् ।
दर्जनौँ फिल्ममा काम गरेकी उनी म्युजिक भिडियोमा पनि उत्तिकै व्यस्त थिइन् । झरनाकी आमा ललना बज्राचार्यले अन्नपूर्ण पोस्टलाई दिएको जानकारी अनुसार अहिले उनी पति र ५ वर्षीय छोराको साथमा रमाइरहेकी छिन् । झरनाका पति मलेसियन नागरिक हुन् । अब कोरोना महामारी कम भएपछि श्रीमान र छोरासँगै नेपाल आउने झरनाकी आमाले अन्नपूर्णलाई बताइन् ।
निलिमा गुरुङ
कास्की ताङतिङ गाउँ निवासी निलिमा गुरुङ सन् १९९७ मा मिस नेपाल भएकी थिइन् । मिस नेपाल घोषणा गर्ने दिन उनले धेरैलाई आश्चर्यमा पार्ने गरी तमू पहिरन लगाएर उपस्थित भएकी थिइन् । सोहीकारण निलिमाले गुरुङ जाति तथा संस्कृतिको प्रतिनिधित्व गरेको भन्दै धेरैबाट प्रशंसा समेत पाएकी थिइन् । हाल उनी परिवारको साथ बेलायतमा बस्छिन् ।
निरु श्रेष्ठ
छैठौँ मिस नेपाल घोषित भएकी थिइन् निरु श्रेष्ठ । १९९८ मा मिस नेपाल बनेकी ज्योती प्रधान एक वर्ष नपुग्दै सम्झौता तोडेर अमेरिका पुगेपछि आयोजकले उनको ताज खोसी निरुलाई प्रदान गरेको थियो।
उषा खड्गी
उषा सातौँ मिस नेपाल हुन् । सन् २००० मा आयोजित मिस नेपाल प्रतियोगितामा उनी विजेता भएकी थिइन् । उनी अहिले कुपण्डोलस्थित बूटिक व्यवसाय गर्दैआएकी छन् । श्रीमान जिपी तिमिल्सिनासँग सम्बन्धविच्छेद भएपछि उषा छोरीसँगै बस्न थालेकी छन् । बूटिकसँगै विज्ञापनहरुको भिडियोका लागि समेत काम गर्दैआएको उषाले अन्नपूर्णलाई बताइन् ।
माल्भिका सुब्बा
२००२ मा मिस नेपाल बनेकी माल्भिका अभिनयसँगै मिडिया क्षेत्रमा पनि छिन् । २० वर्षदेखि मिडियामा कार्यरत उनी पछिल्लो समय हिमालय टेलिभिजनमा ‘जीवनसाथी’ कार्यक्रम प्रस्तुत गर्छिन् । यससँगै आइडिया स्टुडियो नेपाल र केही अनलाईनमा पनि उनले काम गरिहेको बताएकी छन् ।
सुगारिका केसी
२००५ को मिस नेपाल विजेता हुन् सुगारिका केसी । हाल इमेज रेडियोमा 'शुभदिन' कार्यक्रम प्रस्तोता रहेकी सुगारिका १० वर्ष भन्दा अघिदेखि मिडियामा सक्रिय छिन् । उनले अभिनय वाहेक पनि विभिन्न टेलिभिजन र रेडियोमा काम गरेकी छन् । पछिल्लो समय उनी सामाजिक कामहरु समेत व्यस्त छिन् । यस्तै उनी व्यक्तित्व विकास, सञ्चार सीपसम्बन्धी तालिमहरु समेत दिने गर्छिन् । विशेषगरी मिस नेपाल प्रतिष्पर्धीहरुलाई तालिम दिने काममा उनको दक्षता छ ।
श्वेता सिंह
सन् १९९९ की मिस नेपाल श्वेता सिंहले लखनउ विश्वविद्यालय, भारतबाट मनोविज्ञानमा स्नातकोत्तर गरेकी हुन् । उनी मिस नेपालको छैटौँ विजेता हुन् । उनले सन् २००९ देखि ‘इन्स्टिच्युट अफ प्रोफेसनल डेभलपमेन्ट’ (आईपीडी) नामक संस्था चलाएकी छन् ।
प्रीति सिटौला
मिस नेपाल २००३ को विजेता हुन् प्रीति सिटौला । सिटौलाले अमेरिकाको भर्जिनिनयास्थित लिबर्टी युनिभर्सिटीबाट पब्लिक रिलेसन र मार्केटिङमा स्नातकोत्तर गरेकी हुन । उनले आईपीडीको निर्देशक भएर पनि काम गरेकी छन् ।
पायल शाक्य
पायल शाक्य ११ औँ मिस नेपाल हुन् । हाल उनी अस्ट्रेलियाको सिड्नीमा बसोबास गर्छिन् । ओप्टसमा कार्यरत उनी मिस नेपाल भएपछि विभिन्न किसिमका सामाजिक कार्यहरु गरेकी थिइन् । उनी सिमसार तथा गैंडा संरक्षण अभियानमा समेत उनको योगदान छ। साथै विभिन्न संस्थाको दूत भएर काम गरेको अनुभव उनीसँग छ ।
सीताश्मा चन्द
सीताश्मा चन्द २००७ मा १३ औँ मिस नेपाल घोषित भएकी थिइन् ।
जेनिशा मोक्तान
सन् २००९ मा १४औँ मिस नेपाल बनेकी जेनिशा मोक्तान अहिले पारिवारिक व्यवसायमा व्यस्त छिन् । फाट्टफुट्ट अभिनयमा समेत देखिने उनी व्यवसायी दीपक मल्होत्राका छोरा डिकेशसँग विवाह गरेपछि उनी पनि व्यवसायमै लागिन् । उनी हाल इन्टिग्रेटेड मोबिलिटी सोलुसन्स् (आईएमएस) ग्रुपको मानव संशाधन विभाग प्रमुख हुन ।
सदिक्षा श्रेष्ठ
२०१० की मिस नेपाल सदिक्षा श्रेष्ठ हुन् । ब्यूटी विथ द ब्रेनको रुपमा पनि उनको प्रशंसा गरिन्छ । सन् २०१७ मा नेपाल विद्याभूषण पदक समेत पाएकी उनले पछिल्लो पटक डान्सिङ विथ द स्टारको होस्टको रुपमा काम गरेकी थिइन् ।
मलिना जोशी
सन् २०११ की मिस नेपाल विजेता हुन् मलिना जोशी । सन् २०१४ मा चलचित्र ‘ऋतु’बाट डेब्यु गरेकी उनले ‘द विनर’ ‘झुम्की’ ‘रानी ‘संरक्षण’ र ‘लीला’ लगायत फिल्ममा अभिनय गरेकी छन् । गैरसरकारी संस्थाहरुसँग मिलेर वातावरण तथा वन्यजन्तु संरक्षणको क्षेत्रमा समेत काम गरेको अनुभव उनीसँग छ ।
सृष्टि श्रेष्ठ
सन् २०१२ मा १७औँ मिस नेपाल बनेपछि सृष्टि श्रेष्ठ फिल्ममै व्यस्त भइन् । १२ वर्षको उमेरदेखि परिवारसँग बेलायतमा बसेर पढेकी उनले पफर्मिङ आर्टमा ‘ए लेभल’ गरेकी हुन् । उनले चलचित्र ‘गाजलु’ सहित थुप्रै फिल्ममा अभिनय गरेकी छन् ।
इशानी श्रेष्ठ
इशानी १८ औँ मिस नेपाल विजेता हुन् । मिस नेपाल बनेपछि उनी नेपालको प्रतिनिधित्व गर्दै मिस वर्ल्ड २०१३ मा समेत उत्कृष्ट १० मा पर्न सफल भइन् ।
सुविन लिम्बू
१९ औँ मिस नेपाल हुन् सुविन लिम्बू । धरान स्थायी घर भएकी लिम्बू २०१० मा सम्पन्न मिस मंगोलकी फर्स्ट रनरअप पनि भएकी थिइन । काठमाडौंमै बसोबास गरेर थेम्स कलेजमा बिबिए अध्ययन गरेकी सुविनले अध्ययन तथा कविता लेखनमा विशेष रुचि राख्ने र भविष्यमा सफल उद्यमी बन्ने लक्ष्य लिएको बताउँछिन् ।
इभाना मानन्धर
२०औँ मिस नेपालको रुपमा सन् २०१५ मा विजेता बनेकी इभाना अमेरिकाबाट ‘मार्केटिङ इन्टरप्रेनरसीप’ मा स्नातक गरेकी हुन् ।
अस्मी श्रेष्ठ
मिस नेपाल २०१६ को ताज जित्न सफल भएकी अस्मीको स्थायी घर चितवन हो । हाल उनी काठमाडौँमै इन्टेरियर डिजाइरको रुपमा व्यस्त छिन् ।
निकिता चन्दक
निकिता २२ औँ मिस नेपालको रुपमा २०१७ को विजेता हुन् । भारतको राजस्थानबाट १२ कक्षाको अध्ययन पूरा गरेकी उनले बैंग्लोरस्थित जेडी इन्ष्टिच्युट अफ फेसन टेक्नोलोजीमा ग्र्याजुएशन गरेकी छन् ।
मिस नेपाल प्रतियोगिताको इतिहासमा सम्भवत: पहिलो मधेसी विजेता समेत हुन् निकिता । मिस नेपाल बनिसकेपछि उनले विभिन्न विदेशी फेशन शोहरुमा समेत र्याम्प नापेकी छन् । साथै नेपाली फिल्म ‘रानी महल’मा उनले अभिनय गरेकी छन् ।
श्रृखंला खतिवडा
हेटौँडा स्थायी घर भएकी २२ वर्षीया शृङ्खला खतिवडाले २०१८ मा मिस नेपालको उपाधि जितेकी हुन् । पछिल्लो समय सामाजिक सेवामा व्यस्त उनी हार्वर्ड विश्वविद्यालयमा शहरी विकास विषयमा स्नातकोत्तर तहको अध्ययन गर्न अमेरिका गएकी छन् । ‘मिस नेपाल’ भएसँगै निरन्तर चर्चामा रहेकी उनी नेकपा एकीकृत समाजवादीका नेता तथा संघीय सांसद् विरोध खतिवडाकी छोरी समेत हु्न् । उनकी आमा समेत नेत्री हुन् ।
अनुष्का श्रेष्ठ
पछिल्लो समय नेपाली मौलिक मिठाइ 'माक्कुसे' व्यवसायमा व्यस्त छिन् अनुष्का । ‘माक्कुसे’ लाई उनी आधुनिक स्वादमा परम्परागत नेपाली रेसिपी डेसर्ट ब्राण्डको रुपमा चिनाउँछिन् । माक्कुसेलाई नेवार समुदायको स्वादिलो परिकारको रुपमा लिइन्छ । उनी २०१९ की विजेता हुन् । अनुष्काले अष्ट्रेलियाबाट उच्च शिक्षा हासिल गरेकी छन् ।
नम्रता श्रेष्ठ
नम्रता २०२० की मिस नेपाल विजेता हुन् । २३ वर्षको उमेरमा मिस नेपाल विजेता भएकी थिइन् उनी। शिक्षण पेशाको अनुभव संगालेकी उनी अहिले समाजसेवामा व्यस्त छिन् । नम्रतापछि नेपालमा कोरोना महामारीका कारण मिस नेपालको इभेन्ट नै भएको छैन ।
प्रतिक्रिया दिनुहोस !
