हुम्ला पहिरोमा वेपत्ता छजनाकै शव भेटियो, आजै दाहसंस्कार गरिने
कात्तिक ३, २०७८ बुधबार १५:०:०
मुगु : मंगलबार राति पहिरोमा बेपत्ता भएका हुम्लाका एकै परिवारका छ जनाको शव भेटिएको छ। पहिरोले घर पुर्दा एकै परिवारका ६ जनाको मृत्यु भएको हो। मृतकको सनाखत भइसकेको र जिल्ला अस्पतालबाट चिकित्सकसहितको टोली गाउँ पुगिसकेको छ। पोस्टमाटर्म पछि शवको दाहसंस्कार गरिने प्रहरीले बताएको छ ।
हुम्लाको खार्पुनाथ गाउँपालिका– ५ खर्पेल गाउँका धनवीरे शाहीको परिवारका ६ जनाको मृत्यु भएको हो। मृत्यु हुनेमा ६५ वर्षीय धनवीरेसहित ५५ वर्षीय कलबहादुर शाही ३० वर्षीया धोक्ची शाही, १० वर्षीय अलिन्द शाही, ६ वर्षीय हुमेश शाही र दुई वर्षका जसबहादुर शाही रहेको जिल्ला प्रहरी कार्यालयका डिएसपी हेरम्ब शर्माले जानकारी दिएका छन्।
गाउँमा पहिरोको जोखिम भएकाले स्थानीय देवीदेवताको माडुमा आश्रय लिएर बसेको स्थानीय प्रकाशबहादुर शाहीले जानकारी दिए।
प्रतिक्रिया दिनुहोस !
