परासी : नेकपा एमालेको १०औं महाधिवेशन प्रतिनिधि छनौटअन्तर्गत पश्चिम नवलपरासीमा भएको निर्वाचनमा सभासद् र उपमेयरले हार व्यहोर्नु परेको छ। सबै वडाअधिवेशन निर्विरोध गरेको जिल्ला कमिटीले महाधिवेशन प्रतिनिधि छनौटमा भने सहमति जुटाउन नसकेपछि शनिबार निर्वाचन भएको थियो ।
जिल्लामा २ वटा निर्वाचन क्षेत्र छन् । १ वटा निर्वाचन क्षेत्रबाट २ महिलासहित ६ जना गरी जिल्लाबाट कुल १२ जना महाधिवेशन प्रतिनिधिमा निर्वाचित भएका छन् । जिल्लाका कुल ४२ सय ९६ जना संगठित सदस्यले उनीहरुलाई चयन गरेको निर्वाचन समितिले जनाएको छ ।
महाधिवेशन प्रतिनिधिका लागि जिल्लाका निर्वाचन क्षेत्रहरुबाट सभासद मेयर र उपमेयरले उमेदवारी दिएका थिए । जसमा संघीय निर्वाचन क्षेत्र नं. २ बाट उमेदवारी दिएकी लुम्बिनी प्रदेश सभासद् भगवती भण्डारी र सुनवल नगरपालिकाका उपमेयर दधिराम अर्याल पराजित भएका हुन् ।
यस क्षेत्रमा ६ महिलासहित १७ जनाले उमेदवारी दिएका थिए । महिला तर्फबाट उमेदवार दिएकी सभासद् भण्डारी ३ सय ३७ मत अन्तरले पराजित भएकी हुन् । उनी समानुपातिक सभासद् हुन् । त्यसैगरी खुला तर्फबाट उमेदवार दिएका उपमेयर अर्याल २३ मत अन्तरले पराजित भएका हुन् । महाधिवेशन प्रतिनिधिमा निर्वाचित हुनेमा खुलातर्फ डोलराज भण्डारी, थानप्रसाद गैरे, केशव भण्डारी र लेखनाथ खरेल छन् । महिलातर्फ विमला अर्याल र लक्ष्मी क्षेत्री निर्वाचित भएका छन् ।
त्यस्तै संघीय निर्वाचन क्षेत्र नं. १ बाट खुलातर्फ लुम्बिनी प्रदेशका सभासद् दीपेन्द्र कुमार अधिकारी, बर्दघाट नगरपालिकाका प्रमुख धीरज शर्मा बस्याल, रामप्रसाद अर्याल र बद्री खनाल निर्वाचित भएका छन् ।
महिलातर्फ सरिता खनाल र सिन्धु जलेसा निर्वाचित भएका छन् । त्यहाँ ५ महिलासहित १५ जनाले उमेदवारी दिएका थिए । राष्ट्रिय महाधिवेशन मंसिर १० देखि १२ गते चितवनमा हुँदैछ।
प्रतिक्रिया दिनुहोस !
